Qızıl ucuzlaşıb: son 6 ayda 17% dəyər itirib

Qızıl ucuzlaşıb: son 6 ayda 17% dəyər itirib - ŞƏRH

ABŞ Federal Ehtiyatlar Sisteminin (FED) uçot dərəcəsinin mütəmadi artırmaq ilə bağlı qərarları qızıl bazarını da “vurub”. Son 6 ayda dünya bazarında 17% dəyər itirərən qızılın hər qramının qiyməti 63 dollardan 52 dollaradək ucuzlaşıb. Bir aylıq və eləcə də illik yekunlar da neqativdir: son 1 ildə 9% dəyər itirən qiymətli metal son 1 ayda 2,3% ucuzlaşıb.

“Ölkə.Az” xəbər verir ki, bunu iqtisadçı deputat Vüqar Bayramov deyib. O bildirib ki, qızılın ucuzlaşması dünya bazarında dolların möhkəmlənməsi fonunda investorların öz pullarını daha çox valyuta bazarına yönəltməsi ilə bağlıdır:

"Eyni zamanda, sözügedən qiymətli metal uzun müddət artım tendensiyasını da qoruyub saxlaya bilməzdi. Digər strateji birjalarda, o cümlədən neft bazarında da volatilliyin yüksək olması valyutalara tələbi artırıb. 2022-ci ilin geridə qalan aylarında dollar səbət valyutalara nisbətən 14% bahalaşıb. Bu isə ondan xəbər verir ki, əgər qızıl yığımları dəyər itiribsə, əksinə dollara sərmayə investorlara gəlir gətirib. 3,25%-lik FED uçot dərəcəsi isə təbii ki, xarici investorlar üçün əlavə qazancdır".

"Azərbaycanda da yığımlarda qızıldan istifadə olunur. Son qlobal və regional dəyişikliklər göstərir ki, daha çevik yığım alətlərindən istifadə vacibdir. Bu, indiki halda yığımlarda gəlirliyi qorumağın yeganə yoludur", - deyə millət vəkili əlavə edib.

Könül
Ölkə.Az