Turan dövlətləri üçün tarixi fürsət: Avropa Birliyi modelinə keçid təklif olunur - VİDEO

Noyabrın 11-də Səmərqənddə Türk Dövlətləri Təşkilatının (TDT) IX Zirvə Görüşü keçirilib.

Dünyada 200 milyona yaxın türk mənşəli insanın yaşadığı dövrdə Türk dövlətlərinin bir təşkilat altında birləşməsi bütün türk dünyası üçün böyük əhəmiyyət kəsb edir.

Bəs sözügedən təşkilat və bu çərçivədə keçirilən son görüş üzv ölkələrin iqtisadiyyatları üçün nə vəd edir?

İqtisadçı ekspert Xalid Kərimli bildirdi ki, iqtisadi əlaqələrin inkişafı üzv dövlətlərin marağına uyğun olsa da, lakin bu yöndə münasibətlər arzuolunan səviyyədə deyil.

Ekspert orta dəhliz boyunca yükdaşımaların artması, ticarət əlaqələrinin güclənməsi üçün gömrük sisteminin sadələşdirilməsini vacib hesab edir.

İqtisadçı deputat Vüqar Bayramov isə bildirir ki, Türk Dövlətləri Təşkilatı regionda real gücə çevirilməkdədir: “əgər Türk ölkələri bir dövlət olsaydılar o zaman həmin dövlət alıcılıq qabiliyyəti nəzərə alınmaqla ÜDM-in həcminə görə dünyada ən böyük 7-ci ölkə olardı. Strateji coğrafı yerləşməni də keyfiyyət meyarı olaraq nəzərə alsaq, o zaman Türk dünyasının gücünü təsəvvür etmək çətin olmaz”, - deyə millət vəkili əlavə edib.

Ekspert Xalid Kərimli isə son dövrdə tez-tez işlədilən “Turan birliyi” ifadəsinə toxunub və bu fikrin nə dərəcədə gerçək ola biləcəyindən danışıb.

Könül
Ölkə.Az