Vüqar Bayramov: "Manatın zəifləməsi heç də neftin düşməsi ilə bağlı deyil"

"Avrozonadakı mövcud durum isə heç də Avropa pulu üçün nikbinlik vəd etmir"

Ölkə.Az xəbər verir ki, iqtisadçı ekspert Vüqar Bayramov həftənin ilk 3 günündə manatın dollara nisbətən məzənnəsi müqayisəli şəkildə aşağı düşməsini şərh edib.

Onun sözlərinə görə, manatın dollara nisbətən zəifləməsi heç də son günlər neftin qiymətinin aşağı düşməsi deyil, avronun dünya bazarında mövqelərinin sarsılması ilə bağlıdır.

"Belə ki, valyuta səbətində avronun payının artması köhnə qitə pulunun kursunun manata təsir etməsinə səbəb olur. Dollar nisbətən zəifləyən avro manatla müqayisədə də dəyər itirib. Son 3 gündə dollara nisbətən dəyər itirən manat avroya münasibətdə güclənib. Belə ki, avqustun 3-də 1 avro almaq üçün 1.1524 manat ödəmək lazım idisə növbəti günlərdə uyğun olaraq rəsmi məzənnə 1.1482 və 1.405 oldu. Buna görə də, manatın məzənnəsinin son günlərdəki azalmasını neftin dünya bazar qiymətinin dəyişməsi ilə əlaqələndirməməlidir", - deyə iqtisadçı bildirib.

Ekspert qeyd edib ki, neftin dünya bazar qiyməti Azərbaycan üçün vacibdir, ancaq onun monetar təsirləri çox qısa deyil, orta müddətli dövrdə özünü göstərir.

"O baxımdan da, əgər yaxın günlərdə avronun məzənnəsi dollara nisbətən möhkəmlənərsə o zaman milli valyutamız da ABŞ pulu qarşısında dəyər qazanacaq.Avronun zəifləməsi davam etdiyi halda isə dollar yenidən Azərbaycan bazarında nisbi möhkəmlənəcək. Avrozonadakı mövcud durum isə heç də Avropa pulu üçün nikbinlik vəd etmir", - deyə Bayramov əlavə edib.

Xatırladaq ki, həftənin ilk 3 günündə manatın dollara nisbətən məzənnəsi müqayisəli şəkildə aşağı düşüb. Mərkəzi Bankın dolların manata kursunu avqustun 3-də 1.0493 müəyyənləşdirdiyi halda növbəti günlərdə rəsmi məzənnə 1.0495 və 1.0499 olub.

Rəşid Mustafazadə

Ölkə.Az