Dövlət Xidməti: Xəzərdə balıqların kütləvi tələfatına rast gəlinməyib

Bir sıra kütləvi informasiya vasitələrindən daxil olan sorğuya görə, Rusiyanın Mahaçqala ərazisinin Xəzər sahili sularında balıqlarının kütləvi tələf olma hallarının qeydə alındığı bildirilir.

Kənd Təsərrüfatı Nazirliyi (KTN) yanında Dövlət Baytarlıq Nəzarəti Xidməti Azərbaycan Respublikasının Xəzər dənizi sahillərində və sahilə yaxın ərazilərdə monitorinq keçirilməsi və bu ərazilərin daim nəzarətdə saxlanılması barədə göstəriş verib.

Xidmətin məlumatına görə, baytarlıq idarələrinə tapşırılıb ki, ölkəmizin dəniz sahili ərazilərində monitorinq keçirən zaman ərazidə ölmüş və xəstəliyə şübhəli balıqlara rast gəlinərsə, onlardan baytarlıq-sanitariya tələblərinə uyğun nümunələr götürülərək Respublika Baytarlıq Laboratoriyasına göndərilsin.

Göstərişə uyğun olaraq, Xəzər dənizi sahili rayonların baytarlıq idarələri (Xaçmaz, Şabran və Siyəzən rayon baytarlıq idarələri) qısa zaman kəsiyində nəzarəti tədbirlər həyata keçiriblər. Eləcə də Xəzər sularında balıqçılıqla məşğul olanlarla və digər müvafiq qurumlarla əlaqə saxlanılıb.

Xidmət bildirib ki, Mahaçqala ərazisinin Xəzər sahili sularında balıqlarının kütləvi tələfatı ilə əlaqədar Azərbaycana heç bir rəsmi məlumat daxil olmayıb.

"Avqustun 5-də aparılan aktiv nəzarəti tədbirlərin nəticəsi olaraq xidməti bildirir ki,Azərbaycanın Xəzər dənizi sahillərində hər hansı balığın tələfatına təsadüf olunmayıb və bu ərazilər daim nəzarətdədir"-deyə, dövlət xidməti əlavə edib.oxu.az

Ölkə.Az