Taksidən istifadənin çətinləşməsi, kütləvi cərimələr - Sığorta ilə bağlı problemin ağır fəsadları

Daxili yanma mühərrikinin iş həcmi kiçik olan minik avtomobilləri sahiblərinin icbari sığorta şəhadətnaməsi əldə edə bilməməsi ciddi problem olub. Demək olar ki, bütün sığorta şirkətləri və sığorta agentləri belə avtomobillərin sahiblərinə sığorta şəhadətnaməsi verməkdən imtina edirlər. Şəhadətnaməni elektron qaydada da əldə etmək mümkün deyil.

Kiçik araşdırma göstərir ki, sığortaçılar əsasən belə avtomobillərin taksi kimi istifadə edilməsi ehtimalına görə onların sahiblərinin məsuliyyətini sığortalamaqdan qanunsuz olaraq imtina edirlər. Lakin belə avtomobilin sahibi qadındırsa, taksi fəaliyyəti ilə məşğul olma ehtimalı az olduğundan imtina etmirlər. 

"Ölkə.Az" xəbər verir ki, bunu nəqliyyat sahəsi üzrə ekspert Ərşad Hüseynli deyib. O bildirib ki, bu kütləvi qanunsuzluğun qarşısı nəinki alınmır, əksinə, onun miqyası artmaqdadır.

Ekspert sığortaçıların bu yanaşmasının çox ağır fəsadlar yaradacağını deyib və həmin fəsadları sadalayıb:

1. Belə yanaşma ciddi sosial fəsadlar doğurmaqdadır, çünki bu tipli avtomobillə taksi fəaliyyəti göstərən insanlar sığorta olmadığından avtomobillərini istifadə edə bilmir, nəticədə gündəlik gəlirlərini itirirlər. Bu, həm də əhalinin taksi xidmətindən istifadəsini çətinləşdirmək deməkdir. 

2. Bu hal avtomobil sahiblərinin kütləvi qanun pozuntusu törətməsi və cərimələnməsi riskini yaradır. Axı icbari sığortasız avtomobil idarə etməyə görə cərimə (fiziki şəxs üçün 50 manat məbləğində) nəzərdə tutulur və DYP həmin cərimələri tətbiq edir (özü də kameralar vasitəsilə elektron qərarla).

3. Bu yanaşma korrupsiogen mühit yaradır. Gələn məlumatlara əsasən, sığorta şirkətlərindəki bəzi işbazlar vəziyyətdən istifadə edərək əlavə “haqq” hesabına belə avtomobil sahiblərinin sığorta problemini həll edirlər.

"Maraqlısı həm də odur ki, artıq bir neçə aydır mövcud olan bu problem sığorta nəzarəti qurumu olaraq Mərkəzi Bank tərəfindən həll edilmir. Nəyi və ya kimi gözlədikləri aydın deyil.
Hesab edirəm ki, bu qədər qanunsuzluğa təcili olaraq son qoyulmalı, göstərdiyim problem qanuna uyğun olaraq aradan qaldırılmalıdır", - deyə ekspert vurğulayıb.

Könül
Ölkə.Az