“Optimal Elektronika” bağlanır?
Məişət texnikası və elektronika məhsulları şəbəkəsi olan “Optimal Elektronika” MMC-nin bağlanacağı iddia olunur.
“Ölkə.Az” xəbər verir ki, bir müddət əvvəl bununla bağlı şayiələr yayılıb.
Bu gün isə mağazalar şəbəkəsinin yenilənmə ilə bağlı bütün filiallarında satışı dayandırması bu şübhələri daha da artırıb.
“Optimal Elektronika” MMC-dən “Ölkə.Az”ın sorğusuna cavab olaraq bildirildi ki, mağazada satış yeni məhsulların gətirilməsi və vitrinlərin yenilənməsi ilə bağlı olaraq dayandırılıb. Fevralın 15-dən sonra şirkət satışa davam edəcək.
Xatırladaq ki, bir müddət əvvəl mətbuatda “Optimal Elektronika” MMC-nin təsisçisi və baş direktoru Əsgərov Əhəd Tofiq oğlunun ölkədən çıxışına qadağa qoyulduğu qeyd olunub.
Bildirilir ki, iş adamının təsisçisi olduğu "Stentor" MMC İqtisadiyyat Nazirliyi yanında Dövlət Vergi Xidmətinin Bakı şəhəri Lokal Gəlirlər Baş İdarəsinə 2 milyon 23 min 752 manat 6 qəpik borcunu ödəsə də, yerli və xarici şirkətlərə olan milyonlara manat borcu aylardır ödəyə bilmir. Son bir ildə 82 filialından 39-u bağlanan "Optimal Elektronika” MMC-nin aylardır işçilərinin maaşlarını ödəmədiyi, əməkdaşlarının 70 faizinin işdən çıxdığı, bir neçəsinin əmək haqqlarının ödənilməsi tələbi ilə məhkəməyə müraciət etdiyi deyilir.
Könül
Ölkə.Az
