Əmlak bazarında passivlik davam edir

2015-ci ilin iyul ayında təkrar mənzil bazarında təklif həcmi -12% azalıb. İyun ayında ümumi təkliflərin sayı 1 590 olduğu halda, bu rəqəm iyul ayında 1 397 təşkil edib.

Ölkə.Az xəbəbr verir ki, bu barədə Oxu.Az-a “MBA Consulting Group” konsaltinq şirkətinin direktoru Nüsrət İbrahimov bildirib.

Təkrar mənzil bazarında qeydə alınan ümumi təkliflərin sayı ötən ilin müvafiq ayı ilə müqayisədə isə -35.0% azalıb. Nəsimi, Nərimanov və Yasamal rayonlarının təklif portfelindəki payı mütləq çoxluq təşkil edib və onların ümumi payı 54%-ə bərabər olub.

Onun sözlərinə görə, bu seqment üzrə bahalı mənzillərin bazar payı 17%-i keçməyib:

“Bundan başqa, bazardakı bahalı mənzillər, yəni hər kvadrat metrinin dəyəri 2000 $/kv.m-dən çox olan mənzillərin bazardakı payı isə 17.6% təşkil edir. Bahalı növ mənzillərdə qeydə alınan orta bazar qiyməti isə 2320 $/kv.m təşkil edib”.

N. İbrahimov qeyd edib ki, təklif üzrə ən çox azalma 3 otaqlı mənzillərdə müşahidə olunub:

“Otaqlar üzrə mənzillərin vəziyyətinə gəldikdə 2, 3 və çoxotaqlı otaqlı mənzillərin sayında azalma baş verib. Təklif üzrə ən çox azalma 3 otaqlılar üzrə qeydə alınıb. 1 otaqlı mənzillərin təklif üzrə payında isə artım müşahidə olunub. Təkliflə yanaşı otaqlar üzrə qiymət azalması 2 otaqlı mənzillərdən başqa digər müxtəlif otaqlı mənzillərdə baş verib”.

“Təkrar yaşayış mənzil bazarında kvadrat metrin qiymətinə görə təklif olunan ən bahalı mənzil “yeni tikili” layihəli 4 otaqlıda qeydə alınıb. “28 May” metro stansiyası yaxınlığında yerləşən 160 kv.m sahəyə malik olan, yaxşı təmirli mənzilin kvadrat metrinin satışa təklif olunan qiyməti 4 100 USD təşkil edib.

Ən ucuz mənzil isə Abşeron rayonunda, Masazır qəsəbəsində yerləşən orta təmirli 72 kv.m-lik sahəyə malik “yeni tikili” layihəli, 1 otaqlı mənzildə qeydə alınıb, 580 USD/kv.m.”-deyə, şirkətin direktoru qeyd edib.

Xatırladaq ki, İbrahimov bazarın bu seqmenti üzrə, eləcə də ümumilikdə mənzil bazarında müşahidə olunan durğunluğu bir sıra amillərlə əlaqələndirir:

“Belə ki, 2015-ci ilin ilk aylarından mənzil bazarında hiss edilən durğunluq iyul ayında da qeydə alınıb ki, bu da öz növbəsində əmlak bazarında qiymətlərin nisbətən enməsi ilə yanaşı tələbin azalmasına da gətirib çıxartıb.

Tələbin azalması ilə yanaşı dünya və daxili bazardakı son dəyişikliklər də Bakının əmlak bazarına təsirsiz ötüşməyib. Neftin qiymətinin ucuzlaşma prosesinin davam etməsi və şimal qonşumuz olan Rusiya iqtisadiyyatında müşahidə edilən durğunluq Bakının mənzil bazarına da mənfin təsir göstərib.

Əmlak bazarında sürən passivliyin nəticəsi olaraq təklif olunan mənzillərin sayında da azalma müşahidə edilib”.

Ölkə.Az