Tikintidə icazə, istismar və söküntü qaydaları dəyişir - YENİ QANUN
“Şəhərsalma və Tikinti Məcəlləsinin təsdiq edilməsi, qüvvəyə minməsi və bununla bağlı hüquqi tənzimləmə haqqında” qanunda dəyişiklik edilməsi haqqında” qanun layihəsi açıqlanıb.
“Ölkə.Az” xəbər verir ki, layihədə bir sıra dəyişikliklər nəzərdə tutulub:
Tikinti obyektlərinin istismarına icazə prosedurları təkmilləşdirilir
Azərbaycanda tikintisi Şəhərsalma və Tikinti Məcəlləsinin tələblərinə uyğun aparılmamış, bu il mayın 1-nə qədər inşa edilmiş, lakin etibarlılıq və təhlükəsizlik tələblərinə uyğunluğuna dair rəyi təqdim edilmiş tikinti obyektlərinin istismarına icazə veriləcək.
Sənədə əsasən, tikinti obyektlərinin istismarına icazə verilməsi ilə bağlı xidmətlərə görə sifarişçi haqq ödəməli olacaq.
Bəzi yardımçı obyektlərin tikintisinə icazə tələb olunacaq
Azərbaycanda hündürlüyü 5 metrdən, sahəsi isə 100 kvadratmetrdən çox olmayan yardımçı obyektlərin tikintisinə icazə tələb olunacaq.
Sənədə əsasən, eyni ölçüdə kənd təsərrüfatı, meşə təsərrüfatı və balıqçılıq fəaliyyəti ilə bağlı obyektərin tikintisi isə icazəsiz həyata keçiriləcək.
Tikinti obyektlərinin sökülməsi qaydası dəyişdirilir
Azərbaycanda Şəhərsalma və Tikinti Məcəlləsinə əsasən tikinti işlərinin dayandırılması barədə qərar qəbul edildiyi gündən 6 ay ərzində tikintiyə icazə alınmadıqda, tikinti işlərinin dayandırılması barədə qərarda nəzərdə tutulan pozuntular 1 il ərzində aradan qaldırılmadıqda tikintisi başa çatmış və yaxud çatmamış tikinti obyekti söküləcək.
Hazırda qüvvədə olan Məcəlləyə görə sözügedən müddətlər müvafiq olaraq 1 il və 2 ildir.
Tikintiyə icazə verilməsinin ümumi qaydaları dəyişdirilir
Azərbaycanda tikintiyə icazə verilməsinin ümumi qaydalarında dəyişiklik ediləcək.
Sənədə əsasən, bundan sonra tikintiyə icazə verilməsi üçün sifarişçi hüquqi şəxs olduqda hüquqi şəxslərin dövlət reyesterindən çıxarış, fiziki şəxs olduqda şəxsiyyətini təsdiq edən sənəd tələb olunacaq. Hazırda bu sənədlərin sürəti tələb olunur.
Tikinti obyekti sifarişçilərindən sənədlər elektron formada qəbul olunacaq
Azərbaycanda tikinti obyektinin sifarişçisindən tələb olunan sənədlərin təqdim edilməsi forması dəyişdiriləcək.
Sənədə əsasən, sifarişçi tikintilərin texniki-iqtisadi əsaslandırma sənədlərini elektron formada hazırlamalı və müvafiq icra hakimiyyəti orqanı ilə və əlaqədar qurumlarla razılaşdırılmasını təmin etməlidir.
Reklam qurğularının tikintisi ilə bağlı tələblər dəyişdirilir
Azərbaycanda reklam qurğularının tikintisinə icazə verilməsi ilə bağlı tələblərdə dəyişiklik ediləcək.
Sənədə əsasən, reklam qurğularının tikintisinə icazə icraatı üzrə hərəkətlər şəhərsalma və tikinti fəaliyyətinin vahid informasiya təminatı sistemi vasitəsilə elektron qaydada həyata keçiriləcək.
