Yararsız keçidə 2 milyona yaxın pul xərclənibmiş - Ekspertdən sərt sözlər

Bakının Nərimanov rayonu Koroğlu Rəhimov küçəsində tikilən piyada keçidi sökülür.

“Ölkə.Az” xəbər verir ki, sözügedən piyada keçidinin tikintisi uzun müddətdir tənqid olunurdu. Həmin ərazidə eynisəviyyəli nizamlanan keçid olduğu təqdirdə müasir şəhərsalmaya zidd olan yerüstü keçidin tikilməsi etirazlara yol açmışdı. Tikilən keçidin piyadaların hərəkəti üçün əlverişli olmadığı deyilirdi.

Həmçinin Şəhərsalma və Arxitektura Komitəsinin tikintiyə rəsmi icazəsi, Bakı Nəqliyyat Agentliyinin isə razılığı olmayıb.

Azərbaycan Avtomobil Yolları Dövlət Agentliyi (AAYDA) tərəfindən sifariş edilən keçidin inşası Dövlət Şəhərsalma və Arxitektura Komitəsi tərəfindən məqsədəuyğun hesab edilməyib.

AAYDA-dan isə sözügedən yerüstü piyada keçidinin sökülərək zəruri olan başqa ərazidə quraşdırılacağı deyilib.

Sosial şəbəkələrdə sözügedən keçidin qanunsuz tikintisi və tikintiyə sərf olunan xərc tənqid olunub.

Memar Dilqəm İsmayılov “Ölkə.Az”a açıqlamasında bildirdi ki, bu kimi piyada keçidlərinin tikintisinə orta hesabla 1-3 mln manat aralığında vəsait sərf olunur və bu xərc istifadə olunan materiallar, quraşdırılan lift və eskalatorlardan asılıdır: “Bu keçidə isə təqribən 1,5-2 mln manat vəsait xərclənib”. 

D. İsmayılovun sözlərinə görə, problemin kökü Azərbaycanda qurumlar arasında bürokratik problemlərin olmasıdır. AAYDA, BNA, İcra Hakimiyyəti kimi çoxlu qurumlar var ki, bunlar produktiv qrumlar deyil: “Avropa təcrübəsində şəhər bələdiyyələrinin olduğunu görürük, Azərbaycanda isə seçkili mer sistemi yoxdur. Əsas problem də buradan başlayır. 

Bu gün normal inkişaf etmiş heç bir ölkədə şəhər içi yeraltı və yerüstü keçidlər tikilmir. Çünki piyadalar əsas prioritet kimi götürülür. Daha sonra az mobilli insanlar – velosiped, skuter və s. istifadəçiləri, ictimai nəqliyyat, ən sonda isə şəxsi avtomobillər gəlir. Bizdə isə şəhəri avtomobil yönümlü tikmək istəsələr də, bunun da öhdəsindən gələ bilmirlər”. 

Ekspert bildirir ki, böyük dəmir yığını şəhər memarlığı üçün estetik görüntü yaratmır: “Müasir şəhərsalmada şəhəri prospektlər, yollar, keçidlər bir neçə yerə parçalamamalıdır. Şəhərin bir tərəfindən digər tərəfinə keçidin mümkün olmaması, şəhəri əlçatan etmir. Bu isə şəhər infrastrukturunun bərbad olduğunu göstərir. Sakinlər şəhərin bir küçəsindən digərinə rahat hərəkət edə bilməlidir. Bu gün dünya üzrə şəhərsalma normativləri bunu tələb edir. Bizdə isə hansı normativlərin tətbiq olunduğu bilinmir”. 

“Bu keçidlər baha başa gəlməklə bərabər, onların saxlanmasına da xərc tələb olunur: liftlərin, eskalatorların saxlanması, keçidin təmizlənməsi, işıqlandırma xərcləri mövcuddur. Bu ödənişlər də büdcə hesabına edilir. Avropa şəhərlərində bu xərclər dövlət büdcəsinin vəsaiti hesabına deyil, hər şəhərin öz büdcəsi hesabına edilir. Şəhər bələdiyyələri də belə səmərəsiz xərclərə yol vermir.

Koroğlu Rəhimov küçəsindəki keçid həmçinin səkinin zəbt edilməsi ilə tikilib. Bu da piyadalar üçün əlçatan deyil. Bakı şəhərində bütün belə infrastrukturlar ləğv olunmalıdır”, - deyə D.İsmayılov əlavə edib.

Könül
Ölkə.Az