Piyadalar üçün cəza tədbirləri sərtləşdirilməlidir - DEPUTAT

Ötən günlərdə Milli Məclisdə İnzibati Xətalar Məcəlləsinə Yol hərəkəti qaydalarının pozuntusuna görə bir sıra dəyişikliklər təklif olundu. Dəyişikliklərə əsasən, yol hərəkəti qaydalarının pozulmasına görə cərimələrin məbləği əhəmiyyətli dərəcədə artırılır.

Belə ki, yolda müəyyən edilmiş hərəkət sürətini 41-60 km/saat həddində aşmağa görə cərimə 150 manatdan 200 manata, 61 km/saat və daha artıq aşmağa görə 250 manatdan 300 manata yüksəldirilir. Birtərəfli yollarda əks istiqamətdə hərəkət edən sürücülərin 100 manat deyil, 150 manat cərimələnməsi təklif edilir. Sürücülər tərəfindən yol hərəkəti qaydalarının pozulması, piyadaya yol verilməməsi nəticəsində zərər çəkmiş şəxsin sağlamlığına yüngül bədən xəsarətinin yetirilməsinə görə 300 manat məbləğində cərimə ediləcək və ya nəqliyyat vasitəsini idarə etmək hüququ 6 aydan 1 ilədək müddətə məhdudlaşdırılacaq. Eləcə də, bunun kimi bir sıra cərimə tətbiqlərində dəyişikliklər ediləcək.

Millət vəkili Rüfət Quliyev nəzərdə tutulan dəyişiklikləri “Ölkə.Az”a şərh edib və bildirib ki, yol-nəqliyyat hadisələrinin qarşısını almaq üçün cəzaların sərtləşdirilməsindən başqa yol yoxdur:

“Avropa ölkələrinin statistikasına nəzər saldıqda görürük ki, Almaniya, Fransa, İtaliya, İspaniya kimi ölkələrdə yol hərəkəti qaydalarını pozmaq və sürət həddini aşmağa görə minimum 200 avrodan 1000 avroya qədər cəza tətbiq olunur. Cərimələrin artırılması doğru addımdır. Sonda cəza tədbiri olmazsa və cərimə tətbiq edilməzsə, təkcə maarifləndirmə qayda-qanuna əməl olunmasına imkan verməyəcək. Təbliğat və maarifləndirmə təbii ki, olmalıdır, lakin bilmək və əməl etmək fərqli şeylərdir”. 

Deputat vurğulayıb ki, qəzalarda piyadaların da rolu var, lakin onlar üçün cərimə məbləğinin artımı yoxdur: Gələcəkdə piyadalar üçün cəza tədbirləri sərtləşdirilməlidir. Qəzaların 65-70%-i sürücülərin səhvi ucbatından baş verdiyi halda, 30-35% hallarda günah piyadalarda olur. Dəyişikliklər qəbul olunarsa, ilkin olaraq onun faydaları ölçüləcək. İkinci addım olaraq isə piyadalar üçün cərimələr artırıla bilər”. 

Azərbaycanda hər il avtoqəzalarda həlak olan, xəsarət alanların sayı minlərlədir. Bu insanların taleyi hər birimiz üçün mühümdür. Bu baxımdan qanunda nəzərdə tutulan dəyişiklikləri və cəzaların sərtləşdirilməsini dəstəkləyirəm”, - deyə R. Quliyev əlavə edib. 

Könül
Ölkə.Az