Assosiassiya sədri bankların vəziyyətindən danışdı
Bu gün Azərbaycanın bank sektoru kifayət qədər dayanıqlıdır. "Ölkə.Az" xəbər verir ki, bunu Azərbaycan Banklar Assosiasiyasının (ABA) sədri Zakir Nuriyev bankların bağlanma riski və sektorun mövcud vəziyyəti ilə bağlı danışarkən deyib. O bildirib ki, aktivlərin həcminin artımı, kredit portfelinin aktiv şəkildə böyüməsi, 12,2 milyard manatın üzərində əhali əmanətlərinin banklara cəlb edilməsi, əmanətlərin dollarlaşma səviyyəsinin aşağı düşməsi bankların sürətli inkişafının göstəricisidir: "Banklar artıq yeni texnologiyaları daha sürətli təqdim etməyə, çevik şəkildə beynəlxalq aləmdə gedən proseslərə reaksiya verməyə çalışır. Bank sektoru bugünkü çağırışlara düzgün reaksiya verir".
Z. Nuriyev hazırda problem yaşayan banklardan danışmaq istəməyib və banklar tərəfindən təqdim edilən hesabatların dəqiq olduğunu deyib: "Qanunvericiliyə ediləcək son dəyişikliklər nəzarət mexanizmini daha da təkmilləşdirəcək".
Qeyd edək ki, bir müddət əvvəl Azərbaycan Mərkəzi Bankı məcmu kapitalın aşağı olması səbəbindən "Günay Bank" ASC-nin lisenziyasını ləğv etmişdi. Həmçinin sektorda "Günay Bank" ilə eyni vəziyyətdə olan bankların olduğu deyilmişdi.
Könül
Ölkə.az
