"Zaminbank" iflasın bir addımlığındadır

Ölkə.Az xəbər verir ki, "Zaminbank" vətəndaşların bank hesabında olan pulunu verə bilmir.

Əldə etdiyimiz məlumata görə, "Zaminbank" bankda hesabı olan vergi ödəyiciləri, sahibkarlar, hüquqi şəxslər və şirkətlərin hesablarına gələn pulu günlərlə verə bilmir.

Müştərilərin verdiyi məlumata görə, rayonladan, xaricdən kimin adınasa köçürdülən pulları vətəndaşlar almaq istəyərkən bank tərəfindən incidilir, süründürülür və günlərlə gözlədilirlər. Bankın bəhanəsi isə, "bu gün kassada pul yoxdur", "sabah gələrsiz", "o biri gün yaxınlaşın"dır. "Zaminbanka" adına rayondan pul göndərilən müştərilərdən biri deyir ki, 21.08.2015-ci il tarixində gələn pulu dava-qırğınla 05.09.2015-ci il tarixində çıxara bilib.

"Zaminbank" müştərilərinin Ölkə.Az-a verdiyi məlumata görə, müştərilər "Zaminbank"dan pulu götürə bilməyəndə bankın qaynar xəttinə zəng edirlər. Bu zaman "Zaminbank"ın qaynar xətti müştəriləri müxtəlif şöbələrlə birləşdirir və beləcə telefonda ötür-ötür oyunu başlayır. Ən nəhayət "Zaminbank"ın baş müsahibinin nömrəsini verirlər. Baş müsahib isə ya telefona cavab vermir, cavab verəndə isə hər dəfə iclasda olur, sonra əlaqə saxlamağı xahiş edir.

Əldə etdiyimiz məlumata görə, "Zaminbank" iflas etmək üzrədir. Bank artıq müştərilərin tələblərini yerinə yetirə bilmir. Hesaba gələn pulları nəğdləşdirməkdə çətinlik çəkir. Yaxın günlərdə "Zaminbank iflas etdi" xəbərini hər birimiz eşidə bilərik.

Qeyd edək ki, bu il ölkədə 3 bank iflas elan olunub. Proqnozlara görə, daha bir neçə bankın da iflası gözlənilirdi.

Mövzuya qayıdacağıq...

Səxavət Məmməd
Ölkə.Az