Azərbaycan və Moskva hökumətləri arasında əməkdaşlıq memorandumu imzalandı

İkitərəfli əlaqələr daha da inkişaf edəcək

Sentyabrın 25-də Azərbaycan Respublikası Baş nazirinin birinci müavini Yaqub Eyyubov Moskva meri Sergey Sobyaninin başçılıq etdiyi nümayəndə heyəti ilə görüşüb.

Yaqub Eyyubov Rusiya nümayəndə heyətinin Azərbaycana bu səfərinin ölkələrimiz arasında əməkdaşlığın daha da genişləndirilməsi, dostluq əlaqələrinin möhkəmləndirilməsinə böyük töhfə olacağını bildirdi. Baş nazirin birinci müavini qeyd etdi ki, Azərbaycan Prezidenti bununla bağlı konkret tapşırıqlar verib və danışıqlarda bu məsələlər də diqqət mərkəzində olacaq.

Rusiyanın Azərbaycanın əsas tərəfdaşlarından biri olduğunu deyən Y.Eyyubov iki ölkə arasında əmtəə dövriyyəsinin yüksək səviyyədə olduğunu söylədi. Baş nazirin birinci müavini Azərbaycanın Rusiyanın bir çox subyektləri ilə də sıx əlaqələr qurduğunu, bu sırada Moskvanın birinci yerdə durduğunu vurğuladı.

Azərbaycan ilə Rusiya arasında çoxəsrlik əlaqələrin olduğunu bildirən Sergey Sobyanin ölkələrimiz arasında ticarət dövriyyəsinin bu il 30 faiz artdığını bildirdi. S.Sobyanin dedi ki, imzalanacaq sənədlər Azərbaycandan Moskvaya kənd təsərrüfatı məhsullarının çatdırılmasını sürətləndirəcək. Bu istiqamətdə əməkdaşlıq üçün geniş imkanlar mövcuddur. Mer, eyni zamanda, Moskvanın Azərbaycanla turizm, mədəniyyət, şəhər abadlığı sahələrində də əməkdaşlığı genişləndirə biləcəyini söylədi. S.Sobyanin Azərbaycandan Rusiyaya meyvə-tərəvəzlə yanaşı, ət məhsullarının da ixrac olunması ilə bağlı hazırda danışıqların getdiyini qeyd etdi. O, imzalanacaq sənədlərin ikitərəfli əlaqələrin daha da inkişafına təkan verəcəyinə əminliyini bildirdi.

Görüşdə Baş nazirin birinci müavini Yaqub Eyyubov və mer Sergey Sobyanin Azərbaycan və Moskva hökumətləri arasında anlaşma və əməkdaşlıq haqqında memorandumu imzaladılar. Bundan əlavə, Azərbaycandan Rusiyaya məhsulların ixrac olunması ilə bağlı iş adamları arasında ikitərəfli sazişlər imzalandı./Azərtac/

Ölkə.Az