Azərbaycanlılar artıq Gürcüstandan avtomobil almaq istəmir

İl ərzində qonşu ölkədən Azərbaycana cəmi 2 800 avtomobil gətirilib

Bu ilin yanvar-avqust aylarında Gürcüstandan Azərbaycana 51 mln. 237,8 min dollar dəyərində 2 844 ədəd minik avtomobili ixrac olunub.

Bu barədə “APA-Economics” Gürcüstan Milli Statistika Xidmətinə istinadən məlumat verib.

Bu göstərici ötən ilin analoji dövrü ilə müqayisədə 10 946 ədəd avtomobil və ya 4,85 dəfə azdır. Ötən ilin analoji dövrü ilə müqayisədə Gürcüstandan ixrac olunan minik avtomobillərinin həcmi dəyər baxımından 3,55 dəfə azalıb.

Qeyd edək ki, bu 8 ayı ərzində Gürcüstandan Azərbaycana ixrac olunan malların ümumi həcmində bu kateqoriyanın xüsusi çəkisi 29,67% təşkil edib.

Hesabat dövründə Gürcüstandan Azərbaycana ixrac olunan avtomobillərin həcmi bu ölkənin ümumi avtomobil ixracının 41,1%-ini təşkil edib.

Bu ilin yanvar-avqust ayları ərzində ölkənin ümumi ixracında isə Azərbaycana ixrac olunan məhsulların xüsusi çəkisi 11,83% təşkil edib.

Qeyd edək ki, bu ilin yanvar-avqust ayında Gürcüstandan Azərbaycana 172 646,5 min dollar dəyərində məhsul ixrac edilib ki, bu da ötən ilin 8 ayı ilə müqayisədə 2,19 dəfə azdır.

Ölkə.Az