Bu ərazidə qadağa və ödənişli parklanma narazılıq yaratdı

Ödənişli parkinqin tətbiqindən sonra paytaxt Bakının bəzi küçələrində dayanma-durmanın qadağan edilməsi bir sıra narazılıqlara səbəb olub. Vətəndaşlar özəlliklə iş yerlərinin yaxınlığında avtomobillərini pulsuz park edə bilməməkdən şikayətlənir.

“Ölkə.az” xəbər verir ki, bununla bağlı jurnalist Azər Ayxan da sosial media hesabında paylaşım edib.

“Bu gün səhər tezdən Yerüstü Nəqliyyat Agentliyi (AYNA) redaksiyamızın yerləşdiyi küçəyə (Afiyəddin Cəlilov 12-18) “dayanma-durma qadağandır” işarəsi vurdu. Bundan sonra maşını iş yerimizin qarşısında saxlaya bilməyəcəyik. Sol cərgəni pullu dayanacaq ediblər. Orda 7/24 yer tapmaq mümkün deyil. Ətrafdakı həyətlərin hamısında şlaqbaum var, sakin olmayanlar park edə bilmir. Azərbaycan Yerüstü Nəqliyyat Agentliyi, bir az məntiqlə, vicdanla yanaşın məsələyə. Qərar vermədən öncə araşdırın, tədqiq edin, sonra əsanızı dirəyin. İndi biz nə edək? Maşını sataq, yoxsa hər gün cərimə ödəyək? 8-10 saat ofisdə oluruq. Sabahdan avtomobili iş yerinin yaxınında saxlamaq mümkün olmayacaq. Yol polisi gəlib cərimə yazacaq. Vətəndaşa qarşı belə saymaz və qəddar münasibətin səbəbi nədir axı?”, - deyə paylaşımda qeyd olunur.

Yerüstü Nəqliyyat Agentliyinin mətbuat katibi Tural Orucov məsələ ilə bağlı “Ölkə.az”a açıqlama verib və bildirib ki, parklanma yerlərinin yeni qaydalar əsasında idarə edilməsi bu sahədə nizam-intizamın yaradılmasına, qanunsuz pul yığımının qarşısını almaqla maliyyə şəffaflığının təmin olunmasına xidmət edir:

“Nazirlər Kabineti tərəfindən parklanma yerinin idarə edilməsi ilə bağlı qəbul edilən yeni qaydalar həm tariflərin özünü, həm şəhərin tarif zonalarını, eyni zamanda yığılan vəsaitin xərclənmə istiqamətini müəyyən edir. Parklanma yerlərinin yeni qaydalar əsasında idarə edilməsi bu sahədə nizam-intizamın yaradılmasına, qanunsuz pul yığımının qarşısını almaqla maliyyə şəffaflığının təmin olunmasına xidmət edir. Parklanmaya olan tələbatdan asılı olaraq Bakı şəhərin müəyyən hissələri 4 ödənişli zonaya bölünüb. Bakı şəhərinin mərkəzində parklanmanın 1 saatı 1 manat, digər zonalarda müvafiq olaraq 1 saatı 70, 40, 30 qəpik məbləğində müəyyən edilib. “Yol hərəkəti haqqında” Qanuna əsasən, ödənişli parklanma yerlərində nəqliyyat vasitələrinin 15 dəqiqəyədək parklanması üçün ödəniş tələb olunmur. Saat 22:00-dan saat 07:00-dək və həftənin bazar günləri parklanma ödənişsizdir.
Şəhərin hansısa hissəsində parkinqə olan tələbat azdırsa, bu ərazidə qiymət tənzimlənməsi tətbiq edilmir. Yaşayış yeri parklanma zonasına yaxın olan sakinlərdən ödəniş tələb olunmur. Bunun üçün xüsusi parklanma talonları mövcuddur. Qanunvericiliyə əsasən, ödənişli parklanma ilə bağlı digər hallarda isə imtiyazlar nəzərdə tutulmayıb.

Qeyd edək ki, yeni qaydaların tətbiqi ilə bu sahədə şəffaflaşma müşahidə edilir. Belə ki, parklanma üçün qanunsuz pul yığımının qarşısının alınması məqsədilə ödənişlər iki aydır ki, mobil tətbiq üzərindən yalnız nağdsız qaydada həyata keçirilir. Küçə parklanma yerlərindən istifadəyə görə sürücülərdən nağd şəkildə hər hansı bir ödəniş tələb oluna bilməz. Sürücülərə qanunsuz ödənişlər etməməyi tövsiyə edirik.

Bu günə olan statistikaya əsasən, 160 minə yaxın insan mobil tətbiqi yükləyərək qeydiyyatdan keçib. 15 min nəfər isə balansın artırılması əməliyyatını həyata keçirib.

Müşahidələr göstərir ki, parklanmanın idarə olunmasından sonra əvvəllər avtomobil saxlamaq üçün çətinliklə yer tapılan küçələrdə artıq xeyli sayda boş yer müşahidə edilir.
Parklanmanın düzgün idarəedilməsi yollarda xaosun qarşısını alır və küçələrin daha effektiv olmasına şərair yaradır. Eyni zamanda nəqliyyat axınının tənzimlənməsinə, şəhərin nəqliyyat infrastrukturuna, piyadaların və sürücülərin təhlükəsizliyinə imkan yaradır”, - deyə açıqlamada qeyd olunub.