Azərbaycanda daşınmaz əmlakın qeydiyyatı artdı

Azərbaycanda 2015-ci il ərzində 140 minə yaxın daşınmaz əmlak qeydiyyata alınıb ki, bu da ötən il qeydə alınan göstərici ilə müqayisədə 10% çoxdur.

Bu barədə “Daşınmaz əmlakın qeydiyyatı layihəsi”nin başa çatması ilə əlaqədar yekun İctimai Təqdimatda Əmlak Məsələləri Dövlət Komitəsinin sədr müavini Rafiq Cəlilov bildirib.

Onun sözlərinə görə, qeydiyyat üçün tələb olunan müddətlər də mərhələli şəkildə azaldılıb:

“Mülkiyyət hüquqlarının təkrar qeydiyyatına dair çıxarışların verilməsi 2005-2009-cu illərdə 30-20 gün, 2010-2012-ci illərdə isə 18-14 gün arasında dəyişirdisə, 2013-cü ildən etibarən bu müddət 7 günə, əmlak barədə digər arayışların verilməsi isə 1 günə endirilib”.

Bundan başqa, Rafiq Cəlilov bildirib ki, ötən il Sumqayıt şəhərindəki daşınmaz əmlak obyektlərinin kütləvi qaydada qiymətləndirilməsi layihəsi icra olunub.

“Daşınmaz əmlakın qeydiyyatı ilə bağlı 21 elektron və 3 onlayın xidmət istifadəyə verilib. Onlayın xidmətlərin tətbiqi ilə qeydiyyat prosedurları 4-dən 1-ə endirilib”, - deyə sədr müavini əlavə edib.oxu.az

Ölkə.Az