Bankların bağlanmasının əsas səbəbi: iqtisadiyyatın çökmə riski

Bankların bağlanmasının əsas səbəbi: iqtisadiyyatın çökmə riski - AÇIQLAMAxa0

Bu il lisenziyası ləğv olunan “Günay Bank” və “Muğanbank” qocaman banklardır və onların rəhbərləri də qocaman bankirlər olub. Onların yetəri qədər təcrübələri var. Demək ki, bu onların səhvləri ilə əlaqədar olmaz. Sadəcə, rəqabətin olduğu bir mühitdir, müasirləşmə dövrü gedir, tələblər artır. Normativ baza və onun tələbləri var.

“Ölkə.Az”ın məlumatına görə, bunu “Paşa Bank”ın İdarə heyəti sədrinin müavini Bəhruz Nağıyev lisenziyası ləğv olunan banklar haqqında danışarkən deyib.

O, qərarların bu əsasda verildiyini düşünür: “Mərkəzi Bank qərarının açıqlamasını verib və bağlanmanın səbəblərini izah edib. Sırf normativ əmsalların yerinə yetirilməməsi nəticəsində belə qərarlar ortaya çıxıb”.

“Bu həm də requlyatorun bank və maliyyə sisteminin sabitliyini təmin etmək üçün onun birbaşa öhdəliyidir. Normativ bazada tələblər yerinə yetirilməzsə, hər birimizi belə bir aqibət gözləyə bilər. Çünki məsuliyyət daşıyırıq, iqtisadiyyatın aparıcı qüvvəsi olan kiçik və orta sahibkarlıq, hüquqi şəxslərin vəsaitləri ilə bank fəaliyyəti göstəririk. Buna laqeyd yanaşmağın, normativləri düzgün idarə etməməyin nəticəsi iqtisadiyyatın çökməsinə gətirib çıxara bilər. Belə tələblərin öz yerini tapması normaldır”, - deyə B. Nağıyev əlavə edib.

Könül
Ölkə.Az