Əhalisinin hamısı varlı olan cırtdan ölkə - Lüksemburq necə zəngin oldu? (VİDEO)
Qərbi Avropada dənizə çıxışı olmayan 2586 kv km ərazidə yerləşən Lüksemburqun 660 min nəfər əhalisi var. Lakin əhalinin yarısı demək olar ki, burada yaşamır və Belçika kimi qonşu ölkələrə köçərək iş üçün səhərlər buraya gəlib, axşamlar isə geri qayıdırlar.
Ölkə ərazisi olduqca kiçikdir. Başqa yolla izah etsək, Azərbaycan ərazisinə 33 ədəd Lüksemburqun yerləşdiyini deyə bilərik.
Lüksemburqun tarixi 963-cü ildən qraf Siqfridin Lütteburq qalasını qurdurması ilə başlayır. Lakin bura əsrlər boyu Avstriyalı habsburq imperiyası, daha sonra Belçika və Fransa tərəfindən işğal edilib, nəhayət, 1827-ci ildə müstəqilliyinə qovuşub. Bu da əhali tərkibinin geniş olmasına, istifadə edilən dillərin çox olmasına səbəb olub. Dövlət hələ də Qraflıq sistemi ilə idarə olunur.
Ölkənin paytaxtı Lüksemburq şəhəri 1995 və 2007 illərdə Avropanın mədəniyyət paytaxtı seçilib. Burada tarixi memarlıq qorunur, şəhər insanı orta əsrlərə aparır. Məşhur şengen vizası Lüksemburqun Şengen bölgəsinin adı ilə bağlıdır.
Ölkə inkişaf etmiş iqtisadiyyata sahibdir və adambaşına düşən milli gəlirinə görə ilk pillələrdədir. 2023-cü il üzrə adambaşına düşən gəlirinin 136 min dollar olacağı gözlənilir. Lüksemburq uzun illər bu göstəriciyə görə birinci yerdə qərarlaşıb. Ölkə əhalisini Avropanın ən varlıları adlandırmaq olar. Burada bütün sahələrdə qiymət yüksəkdir, turistlər kifayət qədər pul xərcləməli olurlar.
Bəs Lüksemburqun bu qədər zəngin olmasının səbəbi nədir?
Ölkənin qazanc gətirən xüsusi özəlliyi olmasa da, Lüksemburqu zəngin edən investisiya strategiyasıdır. Vergilər o qədər aşağıdır ki, bura vergi cənnəti hesab edilir. Böyük, məşhur şirkətlər həm də təhlükəsizliyinə və iqtisadi sabitliyinə görə Lüksemburqu seçir.
Yatırımlar bu ölkədə bank sektorunun inkişafına səbəb olub. Hələ 2009-cu ildə burada 152 bank fəaliyyət göstərirdi. Bu banklarda 1 trilyon dollara yaxın vəsait saxlanılır. Avropa İnvestisiya Bankı da Lüksemburqda yerləşir.
Ölkə sənayesi isə əsasən metallurgiyadan ibarətdir. Dünyanın ən böyük polad şirkətlərindən biri olan “Arbed” 1911-ci ildə burada yaranıb.
Turizm 2009-cu ildə iqtisadiyyatın 8,3%-ni təşkil edib. Əslində, Lüksemburq Avropanı gəzmək istəyənlər üçün hədəf ölkə olmayıb, adətən, Belçika və Almaniya kimi ölkələrə səfər edənlərin “gəlmişkən Lüksemburqu da gəzim” fikrində olduğu ölkədir. Təsadüfi deyil ki, ölkədə gecələmələrin 44%-ni işgüzar səyahətlər təşkil edir.
Kənd təsərrüfatı olduqca kiçikdir ölçüdə olsa da, məhsuldarlığı yüksəkdir.
İctimai nəqliyyat yerli əhali və turistlər üçün pulsuzdur. Səhiyyə və dərman xərcləri də dövlət tərəfindən qarşılanır.
Əhali istirahət günlərində digər ölkələrə üz tutur. Həftə içi saat 19.00-dan sonra və bazar günləri istirahət məqsədilə bütün mağaza və restoranlar qapalı olur.
Mənzillər isə olduqca bahadır. Göydələnlər yoxdur, əvəzində isə kiçikmərtəbəli tikililər var ki, bu da mənzil təklifini azaldır.
Lüksemburqun 2023-cü il üzrə proqnozlaşdırılan nominal ÜDM-i 89 milyard dollar, adambaşına düşən ÜDM-i isə 136 min dollardır. Ölkədə inflyasiya və işsizlik həddən artıq aşağıdır.
