Azərbaycan xaricdən hansı ərzaq məhsulları alır?

Xarici ticarətin gömrük statistikası göstərir ki, 2015-ci ilin 8 ayı ərzində yeyinti məhsulları idxalı 3,08% artaraq ümumi idxalın 11,13%-ni təşkil edib.

Bu barədə aqrar sahə üzrə mütəxəssis Vahid Məhərrəmov bildirib.

Onun sözlərinə görə, 2015-ci ilin 8 ayında keçən ilin müvafiq dövrünə nisbətən yeyinti məhsulları ixracı ciddi azalıb:

“Belə ki, meyvə-tərəvəz ixracı 2,69%, şəkər 2,57%, bitki və heyvan mənşəli piylər və yağlar 29%, çay ixracı isə 43,9% azalıb.

Artıq uzun illərdir ki, davamlı olaraq bir sıra ərzaq mallarının idxalı azalsa da, kənd təsərrüfatı məhsullarının idxalı isə artmaqda davam edir. Əsasən kəsim üçün nəzərdə tutulan diri heyvanların idxalı yenə də nəzərəçarpacaq dərəcədə artıb.

Qeyd etməliyəm ki, keçən ilin 8 ayı ərzində olkəyə 33,2 milyon dollar dəyərində diri heyvan idxal olunduğu halda bu il bu göstərici 6,89% artaraq 35,5 milyon dollar təşkil edib. Onu da xatırladım ki, 2010- cu ilin 8 ayı ərzində ölkəyə cəmi 1,7 milyon dollar dəyərində diri heyvan idxal olunduğu halda son 5 il ərzində bu göstərici 20 dəfədən çox artıb”.

Bundan başqa, ekspert bildirib ki, Azərbaycan taxıl alışını artırıb:

“Gömrük komitəsinin təqdim etdiyi statistikada bu ilin 8 ayı ərzində ölkəyə 216,2 milyon dollar dəyərində buğda idxal olunduğu və bu göstəricinin keçən ilin eyni dövrü ilə müqayisədə 34,17% faiz çox olduğu göstərilir.

Keçən ilin anoloji dövründə ölkəyə 183,2 milyon dollar dəyərində dənli bitkilərin məhsulları idxal olunduğu halda, 2015-cü ilin 8 ayı ərzində bu göstərici 67 milyon dollardan çox artaraq 250,7 milyon dollar təşkil edib.

Bu ilin 8 ayı ərzində əvvəlki ilin eyni dövrü ilə müqayisədə meyvə-tərəvəz ixracı 2,69% azaldığı halda eyni qrupa aid olan məhsulların idxal dəyəri 146 faizdən çox artıb.

Keçən ilin yanvar-avqust ayları ərzində 16,6 milyon dollar dəyərində ölkəyə meyvə-tərəvəz idxal olunduğu halda bu ilin 8 ayı ərzində bu göstərici 2,4 dəfə artaraq 40,9 milyon dollar təşkil etmişdi”.

Statistik məlumata görə yeməli meyvələr və qoz-fındıq, sitrus meyvələrinin qabıqları və ya qovun qabıqcıqları keçən ilin müvafiq dövrü ilə müqayisədə 317% artıb.

Keçən ilin anoloji dövründə bu qrupdan olan malın idxal dəyəri 6,2 milyon dollar olduğu halda bu il 4,3 dəfə artaraq 26,6 milyon dollar təşkil edib.

Digər mal qrupları üzrə də, misal üçün, bəzi yeməli meyvəköklülər və kök yumruları - 43%, Unüyütmə-yarma sənayesi məhsulları; səməni; nişastalar; inulin; buğda kleykovinası 15,81 %, yeyinti sənayesinin qalıqları və tullantıları; heyvanlar üçün hazır yemlər-3,28%, müxtəlif ərzaq məhsulları - 35.53%, zülal tərkibli maddələr; modifikasiya olunmuş nişastalar; yapışqanlar; fermentlər keçən ilin müvafiq dövrünə nisbətən 4,53% artıb” - deyə, V. Məhərrəmov qeyd edib.oxu.az

Ölkə.Az