Bu maşınlar üçün parkinq pulsuz ola bilər - AÇIQLAMA

Bakının mərkəzində yeni parklanma yerləri yaradılacaq.

“Ölkə.Az” xəbər verir ki, bununla bağlı Bakı şəhərinin 2040-cı ilədək inkişafına dair Baş planında hədəflər müəyyən edilib. Bildirilir ki, yeni inkişaf ərazilərində parklanma ilə bağlı çatışmazlığın kompensasiya edilməsini nəzərə almaqla parklanma qaydaları çərçivəsində yeni parklanma tarifləri müəyyən ediləcək.

Nəqliyyat sahəsi üzrə ekspert Eldəniz Cəfərli “Ölkə.Az”a açıqlamasında bildirdi ki, yeni tariflər bir sıra amillərədən asılı ola bilər:

“Tariflərin müəyyən edilməsi səlahiyyətləri Nazirlər Kabinetinə məxsusdur. Tariflər həmin ölkənin əməkhaqqı, ictimai nəqliyyatda müəyyən olunmuş gediş haqqı və digər amillərə uyğun olaraq hesablanır”. 

Ekspert deyir ki, elektromobildən istifadənin stimullaşdırılması məqsədilə bu sahədə onlar üçün güzəştlər tətbiq oluna bilər:

“Azərbaycan yaşıl nəqliyyat sisteminə keçir və hökumət elektromobillərdən istifadənin stimullaşdırılması üçün müxtəlif addımlar atır. Bu səbəbdən, yaxın gələcəkdə Bakı şəhərində elektromobillər üçün parklanma yerləri ümumiyyətlə pulsuz edilə bilər. Bu, dövlətin müəyyən qərarlarından asılı olacaq”. 

Həmçinin bir sıra mərkəzi küçələrdə sürət həddinin 30 km/saata endirilməsinə münasibət bildirən ekspert, bu addımın qəzaları azaldacağını düşünür:

“Paytaxtın müxtəlif küçələrində sürət həddinin 30km/saat-a endirilməsi vətəndaşlar üçün hər hansı çətinlik yaratmayacaq. Çünki şəhər mərkəzində sürət həddi aşağı olmalıdır. Bu addım qəzaların sayının azalmasına, yaxud qəzalar zamanı ağır xəsarətlər və ölüm hallarının aşağı düşməsinə səbəb ola bilər”, - deyə E. Cəfərov əlavə edib.

Könül
Ölkə.Az