\"Azercell\" özəlləşdirilə bilərmi? - Ekspert
"Azercell"in mənfəətlə çalışması onun yenidən özəlləşdirməyə çıxarılması məsələsini gündəmə gətirir.
"Ölkə.Az" xəbər verir ki, bununla bağlı İKT sahəsi üzrə ekspert Osman Gündüz paylaşım edib. O bildirib ki, son bir neçə ildir "Azercell"in açıqladığı hesabatlardan tam mənfəətlə çalışdığı görünür: "Hesabatlara baxanda görmək olar ki, gəlirlərini də xeyli artırıb. Cari ilin maliyyə hesabatı açıqlanmasa da gözləntilər pozitivdir. Belə olan halda sual yaranır ki, görəsən hökumət "Azercell"i nə zaman yenidən özəlləşdirməyə çıxaracaq?
Düşünürəm ki, mobil və internet bazarında rəqabətli mühitin inkişafı üçün belə bir addımın atılması indiki zamanda doğu olardı".
Ekspert qeyd edib ki 2018-ci ildən etibarən "Azercell" dövlət şirkətidir. O zaman "Azercell"in payçılarından olan "Telia Sonera" və "Turkcell" "Azercell"in tam səhmdarı olan "Azertel"dəki 51,3% payını dövlətə satıb. 2015-ci ildən sonra "Telia Sonera" Mərkəzi Asiyada olan korrupsiya qalmaqalı ilə bağlı bu regionu, o cümlədən Azərbaycan mobil bazarını tərk edib. 2018-ci ildə isə hökumətimiz bu payı digər şirkətlərə, "Türkcell"ə satmaqdan imtina edib. "Telia Sonera"nın bu payını almaq üçün hökumət Rəqəmsal İnkişaf və Nəqliyyat Nazirliyinə büdcədən təxminən 450 milyon manat vəsait ayırıb. Beləliklə, hazırda "Azercell"in səhmlərin nəzarət zərfi, yəni anlaşıqlı desək, "Azercell"in sahibi Rəqəmsal İnkişaf və Nəqliyyat Nazirliyinin "AzİnTelecom" şirkətidir. Hökumət o zaman çətin dövrlər yaşayan, böhran keçirən, investisiya imkanları tükənən "Azercell"in “dövlətləşdirilməsini” onun sağlamlaşdırılması istiqamətində atılan addım olaraq dəyərləndirmişdi.
