Mətn ölçüsü:
  • 100%

Məktəblərin ətrafında pullu parklanma tənqid olundu - RƏSMİ CAVAB

Son vaxtlar məktəblər, təhsil müəssisələri ətrafında boş ərazilərin ödənişli parklanma zonasına çevrilməsi tənqid olunan məsələlərdən birinə çevrilib.

“Ölkə.Az” xəbər verir ki, Vətəndaşların Əmək Hüquqlarını Müdafiə Liqası İcraiyyə Komitəsinin sədri Sahib Məmmədov müəllimlərin əməkhaqlarının həmin ödənişlər üçün uyğun olmadığını deyib:

"AYNA adlı qurum təhsil müəssələrinin binaları ətrafında olan arxa yollara da dirəyini basdırıb. Müəllimlərin 200-500 manat olan maaşına göz dikən bu qurum nədənsə restoranların qarşısında bu dirəkləri basdırmağa tələsmir. Tam ştatda işləyib 500 manat alan müəllim hər gün ən azı 3 manat pul ödəməlidir. Bunun adı nədir?"

Azərbaycan Yerüstü Nəqliyyat Agentliyinin (AYNA) mətbuat katibi Tural Orucov “Ölkə.Az”a açıqlamasında bildirdi ki, təhsil müəssisələrinə münasibətdə hallarda imtiyazlar nəzərdə tutulmayıb:

"Təşkil edilmiş parklanma yerindən hər iki istiqamətdə yolun hər iki kənarı boyu 100 metr məsafədə yerləşən ev və ya binalarda qeydiyyatı olan sakinlər fərdi parklanma talonu alaraq avtomobillərini onlar üçün ayrılan yerdə ödənişsiz saxlaya bilərlər. Eyni zamanda bu imkanlardan yararlanmaq üçün xarici vətəndaşlar da müvəqqəti qeydiyyat ünvanı üzrə müraciət etmək hüququna malikdirlər. Qanunvericiliyə əsasən, ödənişli parklanma ilə bağlı təhsil müəssisələrinə münasibətdə və digər hallarda imtiyazlar nəzərdə tutulmayıb".

Qurum nümayəndəsi qeyd edib ki, parklanma yerlərinin idarəolunmasının əsas məqsədi şəhərin küçə-yol şəbəkəsində tıxacların və sıxlıqların azaldılması, ictimai nəqliyyatın orta hərəkət sürətinin yüksəldilməsi və bunun nəticəsində onun cəlbediciliyinin artırılmasıdır: "Parklanmanın düzgün idarəedilməsi şəhər yollarında xaosun qarşısını alır və küçələrin daha effektiv, rahat və təhlükəsiz olmasına, həmçinin bütün növ nəqliyyat vasitəsi sahiblərinə şəhərin ərazisindən effektiv istifadə etməyə imkan yaradır". 

"Müşahidələr göstərir ki, parklanmanın idarə olunmasından sonra əvvəllər avtomobil saxlamaq üçün çətinliklə yer tapılan küçələrdə artıq xeyli sayda boş yer mövcuddur", - deyə açıqlamada qeyd olunur.

Könül
Ölkə.Az