Manatla bağlı devalvasiya proqnozu: gələn il...

Yanvar ayında ölkədə valyuta ilə depozitlər 2023-cü ilin dekabrına görə xeyli artıb - yanvarda fiziki şəxslərin xarici valyutada depozitləri 284,4 milyon manat artaraq 4 milyard 555,6 milyon manata, hüquqi şəxslərin xarici valyutada depozitləri 542 milyon manat artaraq 9 milyard 548,9 milyon manata yüksəlib. Bu ilin yanvarında milli valyutada depozitlər 381,1 milyon manat azalıb.

"Ölkə.Az" xəbər verir ki, bunu iqtisadçı ekspert Natiq Cəfərli deyib. O bildirib ki, insanlar manatda olan depozitlərini dollara dəyişməyə başlayıblar:

"Həmçinin 2024-cü ilin yanvar ayında ötən ilin dekabr ayı ilə müqayisədə Azərbaycan banklarının xarici valyutada cəmi kredit portfeli (müştərilərə verilmiş kreditlər) 315,2 milyon manat artaraq 4 milyard 682 milyon manata çatıb. Yanvarda verilən cəmi kreditlərin 82%-i xarici valyutada olub.

Bundan başqa Mərkəzi Bankın keçirdiyi hərraclarda dollara təlabat da kəskin artıb: 2024-cü ilin əvvəlindən bu yana keçirilmiş 15 valyuta hərracında banklara cəmi 1 milyard 207,7 milyon dollar satılıb".

Ekspert deyir ki, bütün bu rəqəmlər valyuta ilə bağlı gözləntilərin artdığını, ciddi ajiotaj, təlaş var olduğunu göstərir:

"Mərkəzi Bank və hökumət isə bu gözləntiləri normal idarə edə bilmir. Vətəndaşlar və bizneslə ciddi kommunikasiya problemi var. Bu isə təlaşı artıran faktordur. Dünyada Mərkəzi Bankların əsas funksiyalarından biri də gözləntiləri idarə etmək, sözlü müdaxilələrlə proseslərə yön verməkdir, hələ ki, bizdə bu sahə axsayır".

"Fikrimcə, Azərbaycanda devalvasiya qaçılmazdır, sadəcə zaman məsələsidir. Açığı, bu il olacağına inanmıram. Çünki ölkədə seçki sürəcləri var, lakin gələn il ərzində hökumət bu addıma getməyə məcbur qalacaq. 2015 devalvasiyalarından sonra manata balaca “hovuz” düzəldib yavaş-yavaş “üzməyi” öyrətməli idilər. Lakin sadəcə inzibatı üsulla məzənnə siyasəti yürütdülər. 2025-ci ildə növbəti 10 illik dövr başa çatır", - deyə N. Cəfərli əlavə edib.

Könül
Ölkə.Az