2024-cü ildə kriptovalyuta sektorunda necə qazanmaq olar?
Bitcoin (BTC) martın 14-ü ilk dəfə olaraq tarixi maksimum qiyməti – 73.777 dollarlıq həddi test elədi. Paralel olaraq digər altkoinlər də dəyər qazandı. Kriptovalyutaların qiymətlərinin yüksəlməsi investorların rəqəmsal aktivlərə diqqətini çəkdi və bu sektora marağı daha da artmağa başladı. Diqqət cəlb edən məqam odur ki, 2017 və 2021-ci illlər ilə müqayisədə hazırda kriptovalyuta bazarına daxil olan əsas investorlar daha təcrübəli korporativ şirkətlər və uzunmüddətli vizyonu olan investisiya fondlarıdır. Kriptovalyutalar kifayət qədər riskli aktivlər olsa belə faktiki olaraq hazırda ən gəlirli investisiya aləti statusunu özündə saxlayır.
Harda səhv edirik?
Bir çoxları kriptovalyutaların xüsusiyyətlərini, tətbiq imkanlarını, təhlükəsiz saxlama formalarını bilmədən investisiya etməyi qərara alırlar. Lakin qiymətın bahalaşmasını səbəb gətirərək tələsik investisiya etmək düzgün deyil. Razıyam ki, investor üçün əsas məqsəd qazanmaqdır lakin “hamı alır məndə alım” prinsipi kriptovalyuta sektorunda keçərli deyil və ani səhv nəticəsində bütün vəsaitlərinizin itirilməsi ilə nəticələnə bilər. Hesab edirəm ki, daha çox qazana biləcəyiniz deyil daha çox bildiyiniz sahəyə yatırım etməniz daha məsləhətlidir. Investisiya etdiyiniz sahə üzrə nə qədər çox bilik və təcrübəniz olsa bir o qədər uğur qazanmaq şansınız çox olacaq. Hətta, hazırda bəzləriniz fikirləşir ki, gərək bitcoin 20.000 dollar və ya ethereum 1.200 olanda alardım. Siz, bəlkə də kriptovalyutaların qiymətinin yaxın gələcəkdə qalxacağını təxmin etmişdiniz lakin həmin vaxt bu aktivləri almaq üçün qətiyyət olmayıb. Lakin yenə də gec deyil.
İnvestisiya portfelini necə qurmaq lazımdır?
Bu sektora yatirim etmək qərarına gəlmisinizsə qətiyyən vaxtı gecikdirməyin və çalışın borc kapital ilə investisiya etməyin. Uzunmüddətli yatırım etmək planınız varsa o halda investisiya portfelinizi: 40%-ni bitcoin/ethereum, 40%-ni özünü doğrultmuş prespektivli altkoinlərdə (Matic, Agix, Chainlink, Flow, Algorand, İoTex, Sand, Enjin, CHZ, İota və s.), 20%-ni isə nisbətən daha riskli lakin yüksək gəlir vəd edən rəqəmsal aktivlərdə (token, NFT, mem koinlər) saxlamağınız daha effektiv olar. Altkoinləri seçərkən diqqətli olun, analiz edin və hissləriniz ilə qərar verməyin. Əsas məqam odur ki, siz investisiya etdiyiniz zaman konkret aktiv üzrə fundamental faktor və texniki analiz üst-üstə düşsün. Çünki, kriptovalyuta bazarında hər zaman kəsiyinin öz “ulduz kriptovalyutaları” olur.
Kriptovalyutaların qiymətinin kəskin enməsinə və ya qalxmasın hazır olun.
Istənilən investisiya müəyyən risk ilə müşayət olunur ki, kriptovalyutaların qiymətinin volatilliyi faktoru bu riskləri ikiqat daha çox artırır. Təcrübə onu göstərir ki, yaşı 35-dək olan investorların əksəriyyəti qısa müddətdə daha çox qazanmaq üçün nisbətən riskli aktivlər olan kriptovalyutalara investisiya etməyi üstün tuturlar. Hətta bəzi investorlar hesab edir ki, kriptovalyutalarn qiyməti ancaq artan temp üzrə gedir və ya daim belə olacaq. Lakin təcrübə göstərdi ki, qətiyyən belə deyil. Kriptovalyuta bazarında qiymətlərin dəyişməsi müxtəlif fundamental faktorlardan aslıdır. Bu səbəbdən qiymətə təsir edən faktorları analiz edərkən səbrli və soyuqqanlı olmaq lazımdır. Qiymətin düşdüyü zaman tələsik qərar verib investisiyanı cıxarmaq və ya qiymətlərin artdığı vaxt əlavə investisiya etməyə tələsməyin.
Özünüzə investisiya edin!
Əgər sizin iqtisadi-texniki bilikləriniz, maliyyə bazarlarının iş prinsipi ilə bağlı məlumatlarınız kifayət qədər deyilsə o zaman çalışın kriptovalyutalara itirməyi gözə aldığınız məbləğdə investisiya edin. Bu sektorda daha təcrübəli olan ekspert və ya real kripto-investorlarla məsləhətləşin. Rəqəmsal aktivlərlə bağlı araşdırma, təlim və konsultasiyayalara pul xərcləməkdən qorxmayın. Öyrənin! Çünki bilgisizlik sizə daha sonra baha başa gələcək. Hazırda sosial şəbəkələrdə kripto təlim reklamları kifayət qədər çoxalıb. Loru dildə desək “yerindən duran” təlim keçməyə başlayıb. Doğrusu, bu sektorda həvəskar gənclərin öyrətmək təşəbbüsünü müsbət qarşılayıram. Amma insanlara yüksək qazanc vəd vermək və təkcə birjada alqı-satqı prosedurlarını öyrətməklə iş bitmir. Təlim keçmək və ya akademik tədris proqramı tərdtib etmək artıq başqa peşədir. Odur ki, təlimi seçərkən mütləq şəkildə təlim təklif edən şirkəti, təlimçinin təhsili, maliyyə və ya İT sahəsində iş təcrübəsinin olmasını, hazırda hansı real proyektdə çalışması barədə araşdırın. Kriptovalyuta sektorunda hər gün yüzlərlə yeni kripto layihələr təqdim olunur və onları analiz etmək üçün sizin ən azı bu sektor üzrə fundamental bilikləriniz olmalıdır.
Təcrübə onu göstərir ki, uğurlu investor olmaq üçün 4 önəmli faktor olmalıdır: kapital, informasiya, risk etmə bacarığı və bir az da şans. Kriptovalyutalar bir investisiya mədəniyyətidir. İnvestisiya etmisinizsə səbrli olub gözləməyi bacarmalısınız.
Mənbə: kriptoinvest.az
