“Amazon” yüzlərlə işçisini ixtisar edir

Amerikanın elektron ticarət nəhəngi “Amazon” yüzlərlə əməkdaşını ixtisar edir.

“Ölkə.Az” xəbər verir ki, bununla bağlı şirkət özü açıqlama yayıb.

Bildirilir ki, bulud hesablamaları sahəsində yüzlərlə əməkdaşın işinə son verilməklə bərabər, satış, marketinq və qlobal xidmətlər departamentlərində də çalışan bir neçə yüz əməkdaş işdən çıxarılıb.

“Amazon Web Services” (AWS) sözçüsü də açıqlamasında işdən çıxarmaların çətin, lakin zəruri qərar olduğunu söyləyib.

Şirkət son dövrlərdə süni intellekt sahəsində investisiyalarını artırsa da, yanvar ayında “Twitch”, “Prime Video” və “MGM” kimi törəmə şirkətlərində yüzlərlə əməkdaşını işdən çıxarmışdı.

ABŞ-ın “Challenger, Gray&Christmas” karyera konsaltinq firmasının hesabatına görə, 2023-cü ildə texnologiya sektorunda işdən çıxarılanlar 73% artıb.

Hesabatda qeyd olunub ki, ötən il işdən çıxarılanların sayı 168 min 32 nəfərə çatıb ki, bu da 2022-ci illə müqayisədə böyük artımdır.

Könül
Ölkə.Az