Bakıda daha bir səki parkinqə çevrildi - VİDEO

Bakı şəhərində daha bir ərazidə piyadalar üçün nəzərdə tutulmuş səki sökülərək parkinqə çevrilib.

"Ölkə.Az"ın məlumatına görə, bununla bağlı görüntülər sosial şəbəkələrdə paylaşılıb.

Sözügedən hal Afiyəddin Cəlilov küçəsi 80 ünvanında qeydə alınıb. Parkinqin həmin ərazidəki 2-3 mərtəbəli obyektlər üçün nəzərdə tutulduğu deyilir.

Məsələ ilə bağlı Azərbaycan Dövlət Şəhərsalma və Arxitektura Komitəsindən bildirildi ki, Komitə yanında Bakı Şəhər Memarlıq və Şəhərsalma Baş İdarəsinin əməkdaşları tərəfindən şəhərsalma nəzarəti qaydasında monitorinq keçirilib və Bakı şəhəri, Xətai rayonu, Afiyəddin Cəlilov küçəsi 80 ünvanında piyada səkisinin parklanma yeri üçün qanunsuz olaraq zəbt edilməsi faktı aşkarlanıb:

"Fakt üzrə müvafiq qaydada akt tərtib edilərək ərazinin saxlanılması, qısa zamanda lazımi tədbirlərin həyata keçirilməsi üçün aidiyyəti üzrə Bakı Şəhər İcra Hakimiyyəti və yerli icra hakimiyyəti orqanına məlumat verilib", - deyə açıqlamada qeyd olunur.

Könül
Ölkə.Az