IFC: Azərbaycan risklərlə üzləşir

Digər mədən yanacağı ixracatçıları kimi Azərbaycan da qlobal dekarbonizasiya səylərindən irəli gələn risklərlə üzləşir.

"Ölkə.Az" xəbər verir ki, bunu Beynəlxalq Maliyyə Korporasiyasının (IFC) Azərbaycandakı nümayəndəsi Aliyə Əzimova "Ambisiyanın artırılması, fəaliyyətin verilməsi: COP29 Davamlı Biznes Forumu"nda deyib.

Onun sözlərinə görə, bu da, rəqabət qabiliyyətinə struktur baxımından təzyiqlər yaradacaq: "Eyni zamanda Azərbaycan hazırda ciddi fiziki iqlim riskləri ilə də üz-üzədir".

A, Əzimova qeyd edib ki, ölkədə su qıtlığı hiss olunur və bunun qeyri-sabit yağıntıların səbəbindən daha da pisləşəcəyi gözlənilir: "Su əlçatanlığının azalması və daha yüksək temperatur məşğulluq ciddi paya malik olan və ən həssas təbəqənin dolanışığına töhfə verən kənd təsərrüfatına əhəmiyyətli təzyiq göstərəcək.

Azərbaycan nəinki bu cağrışların öhdəsindən gələ bilər, həm də iqlim fəaliyyətləri nəticəsində yeni artım mənbələrinə, yeni imkanları "yaşıl artım"a çevirə bilər. Aşağı karbonlu texnologiyalara investisiyalar, innovativ həllərin işlənib hazırlanması və əməliyyatlarda iqlimə davamlılığın qurulması Azərbaycanın özəl sektoru üçün yeni imkanlara yol açır".