Xırdalanda acınacaqlı vəziyyət: İcra Hakimiyyəti niyə mane olur? - FOTO

Xırdalan şəhərində Heydər Əliyev parkının yanındakı Zərifə Əliyeva küçəsində antisanitar vəziyyət yaranıb.

"Ölkə.Az" xəbər verir ki, bu barədə sosial şəbəkələrdə paylaşım edilib.

Bildirilir ki, sözügedən küçədə günaşırı daşınmalı olan zibil artıq 8 gündür həyətdə qalıb:

"Səbəb odur ki, Abşeron rayon İcra Hakimiyyəti öz vəzifəsinin öhdəsindən gəlmir. Həmin ərazidə zibil daşınması ilə bağlı problem dövrü olaraq baş verir. Bir ay normal işləyirlər, növbəti ay zibil daşınmasında problemlər yaşanr. Qonşu yaşayış kompleksində zibillər vaxtlı-vaxtında daşınır. Çünki özəl şirkət həyata keçirir. Bizim binada isə Abşeron rayon İcra Hahimiyyəti müxtəlif vasitələrlə binanı idarə edən MTK-yə imkan vermir ki, özəl şirkətin xidmətinə keçsin. Zibil daşınmasına məsul olan qurumun rəhbəri dəyişib. Yenisi söz vermişdi ki, təmizlənəcək. Artıq o da zənglərə cavab vermir. Səbəb isə maşın çatışmazlığıdır. Deməli, İcra Hakimiyyəti səlahiyyətlərindən sui-istifadə edərək MTK-lərə təzyiq edir ki, onun xidmətindən istifadə etsinlər. Bunun üçün isə zəruri maşın parkı yoxdur", - deyə şikayətdə qeyd olunur.

Məsələ ilə bağlı Abşeron rayon İcra Hakimiyyətinə müraciət etsək də, zənglərimiz cavabsız qaldı.

Könül
Ölkə.Az