Bayram tətilində regionlara maraq artıb - Hotel qiymətləri necədir?

İyunda ardıcıl 5 gün iş olmayacaq. Belə ki, 15 iyun Milli Qurtuluş Günü, 16-17 iyun Qurban bayramı qeyd olunacaq, Tətil günləri şənbə və bazar günlərinə təsadüf etdiyi üçün 18 və 19 iyun tarixləri də qeyri-iş günləri olacaq.

Yay ayında gözlənilən 5 günlük tətil vətəndaşların regionalara marağını artırıb.

Restoranlar və Otellər Assosiasiyasının rəhbəri Samir Dübəndi “Ölkə.Az”a açıqlamasında bildirdi ki, istirahət günlərinin çox olduğu dövrlərdə turizm fəaliyyətlərinə tələb artır:

“Regionlardakı beşulduzlu hotellərdə doluluq yüksəkdir. Vətəndaşlar və xaricilər aktiv şəkildə bronlar edirlər. Daha aşağı kateqoriyalı yerləşmə vasitələrində satış yüksək olsa da, beşulduzlu hotellərdən geri qalır.

Ekspert deyir ki, insanlar istirahətlərini daha çox belə dövrlərə salırlar və tələb artdığı halda turizm xidmətlərində qiymətlərin də artması təbii olur:

“Hazırda hotellərdə məhdud sayda yer qaldığından qiymətlər yüksəlib. “Booking.com” aqreqatoru üzərindən beşulduzlu hotellərdə bayram günlərində qiymətlərin 300-435 manat arası olduğunu görmək mümkündür. Lakin ümumilikdə ötən ilin eyni dövrü ilə müqayisədə hotel və digər yerləşdirmə vasitələrinin qiymətlərində ciddi dəyişiklik görünmür”.

S. Dübəndinin sözlərinə görə, nəqliyyat xərclərinin, məvaciblərin, ekskursiya və bir sıra digər əlavə xidmətlərin, qida məhsullarının qiymətində artım müşahidə olunur. Bunlar isə turizm təkliflərinin, turların qiymətinə təsirsiz ötüşmür: “Qiymətlər tur paketlərdəki təklifə daxil olan xidmətlərin çeşidindən, onların komfort səviyyəsindən asılıdır. Bu gün yerləşmə vasitələrində bir gecəsi 15-20 manatdan başlayan və bir neçə min təşkil edən komplekslərin təkliflərini görmək mümükündür”.

Ekspert qeyd edir ki, regional səviyyədə alternativ yerləşdirmə vasitələrinin təkliflərinin artması müşahidə olunur: “Burada kənd evləri, aqro müəsissələrdə evlər, qonaq evləri, kəmplər və bu kimi digər vasitələri sadalamaq olar. Bu bizneslərin artması rəqabəti artıraraq qiymətlərdə ucuzlaşmaya gətirə bilər. Düşünürəm ki, kənd əhalisi arasında yerləşdirmə, qidalanma və digər turizm xidmətləri göstərmək istəyində olan vətəndaşları təşviq etməli, onlara kredit, subsidiya, həvəsləndirmə üsulları ilə dəstək verməliyik”.

Könül
Ölkə.Az