Həyət evi, yoxsa bina evi? - Alarkən bunlara diqqət edilməlidir
Ölkəmizdə şəxsi ev sahibi olmaq mühüm şərtlərdən hesab edilir. Bu baxımdan gənclərin əksəriyyətinin maddi qazancının əsas hissəsi məhz bu istiqamətə yönəlir. Vətəndaşların bu mövzuda fikirləri müxtəlifdir. Maddi durumdan asılı olaraq, bəzi gənc ailələr bina evi almağa üstünlük verdiyi halda, bəziləri həyət evi almağa yönəlir.
Bəs gənclər və yeni ev almaq istəyənlər üçün bu variantlardan hansı daha əlverişlidir?
Mövzu ilə bağlı Yenisabah.az-a danışan Azərbaycan Qiymətləndiricilər Cəmiyyətinin sədri Vüqar Oruc bildirib ki, tələb və istəklər imkanlara görə dəyişir:
“Bu, ilk növbədə zövqlə bağlı məsələsidir. İnsanlar həyət evində və yaxud mənzildə yaşamaq istəyini öz baxışları və yanaşmaları ilə müəyyən edirlər. Eyni zamanda gənc ailələr maddi baxımdan o qədər də dayanıqlı olmadıqları halda tez bir zamanda mənzilə sahib olmaq istəyirlər. Amma sonradan təbii ki, tələblər və istəklər artır. Bu Azərbaycanda sanki yaşayış səviyyəsinin göstəricisi kimi formalaşıb. Əgər bir insan yaşayış üçün mənzil əldə edirsə, onun ikinci məqsədi yayda istirahət etmək üçün bağ sahəsinə malik olmaqdır. Türkiyədə baş vermiş zəlzələdən sonra, ölkəmizdə bir növ həyət evlərinə maraq artdı. Bu proses bir müddət əvvəl pandemiya dövründə də baş vermişdi. Biz onda da bunun ötəri proses olduğunu demişdik. Pandemiya səngidikdən sonra bu belə də oldu. Xəstəlik səngidikdən sonra bina evlərinin yenidən başlıca alış predimetinə çevrilməsi baş verdi”.
Vüqar Oruc hazırda əmlak bazarında mənzillərin daha çox tələb gördüyünü diqqətə çatdırıb:
“Hal-hazırda bazarı müşahidə etsək, bina evlərinin satışı satışı fərdi yaşayış evlərinin satışından öndədir. Bu daim belə olacaq. Hər hansı bir hadisə bu tendensiyanı sadəcə qısamüddət ləngidə və ya yerlərini dəyişdirə bilər. Ümumi götürdükdə, istər Azərbaycanda, istərsə də dünyada mənzil tipli yaşayış sahələri daha komfort, seçilmiş və zövqə uyğun hesab olunur. İnsanlar yaşlandıqca onların büdcə dayanıqlığı daha da artır. Belə olduqda ailələr əlavə əmlak sahibi olmaq düşüncəsinə gəlirlər. Bu da insanlarda mənzildən əlavə olaraq həyət evi də almaq ənənəsinə söykənir. Lakin seçimə gəldikdə, nəticə regionlar üzrə dəyişir. Buna həm Bakı şəhəri, həm də Bakıətrafı qəsəbələr üzrə fərdi yanaşmaq olar. İri şəhərlərdə daha çox bina evlərinə üstünlük verildiyi halda, regionlarda həyət evlərinə maraq daha böyükdür. Digər tərəfdən insanlar təqaüd yaşına yaxınlaşdıqca təbiətə, kənd yerlərinə daha çox meyl göstərməyə başlayırlar. Gənclər isə daha çox mənzillərə, bina evlərinə üstünlük verir”.
