Büdcə bu qədər artırılacaq

Yenidən baxılan dövlət büdcəsinin gəlirlərinin 2 180.0 milyon manat artırılaraq 36 353.0 milyon manata, xərclərinin 2 944.3 milyon manat artırılaraq 39 707.3 milyon manata, kəsirin 764.3 milyon manat artırılaraq 3 354.3 milyard manata çatdırılması təklif olunur. 

Ölkə.Az xəbər verir ki, bunu Milli Məclisin İqtisadi siyasət, sənaye və sahibkarlıq komitəsinin sədri Tahir Mirkişili parlamentin növbədkənar sessiyasında çıxışı zamanı deyib.

Komitə sədri bildirib ki, aparılan təhlillər əsasən isə bu ilin 4 ayının dövlət büdcəsi icrası göstəriciləri dövlət büdcəsi gəlirlərinin ilin sonuna proqonozlaşdırılan göstəricidən daha da çox olacağını deməyə əsas verir. 

“Eyni zamanda, qanun layihəsinə dair izahatda 2024-cü ilin dövlət büdcəsinə yenidən baxılma nəticəsində dövlət büdcəsinin gəlir və xərclərinin ilin sonuna gözlənilən icra göstəriciləri nəzərə alınaraq icmal büdcənin qeyri-neft baza kəsirinin qeyri-neft ÜDM-ə nisbəti, eləcə də dövlət borcunun ÜDM-ə nisbəti müəyyən edilmiş hədlər daxilində təmin olunacağı göstərilib”, - o qeyd edib.

Komitə sədri əlavə edib ki, regionda baş verən çağırışlar fonunda və Ermənistan ilə sülh müqaviləsinin bağlanması üzərində danışıqların getdiyi bir zamanda müdafiə və təhlükəsizliyimizin gücləndirilməsi həyati əhəmiyyət kəsb edir: “Bu istiqamətdə atılan addımlar həm də beynəlxalq aləmdə və regionda diplomatiyamızın gücünü və kəsərini artırır. Bu istiqamətdə xərclərin artırılması ilə müdafiə və təhlükəsizlik imkanlarımızın artırılması dövlətimizin mövqeyin bütün istiqamətlərdə gücləndirir”. 

Mürtəza
Ölkə.Az