Un qiymətləri artır - Çörək bahalaşacaqmı? - RƏY

Azərbaycanda un qiymətləri artıb.

“Ölkə.Az”ın məlumatına görə, ötən aylarda 25 manat hədlərində olan 50 kiloqramlıq un qiymətlərinin 32 manata qədər yüksəldiyi deyilir.

İqtisadçı ekspert Xalid Kərimli “Ölkə.Az”a açıqlamasında bildirdi ki, bahalaşmaya səbəb unun alış qiymətinin artmasıdır:

“Dünya birjalarında unun fevral-mart qiymətləri ilə müqayisədə artım müşahidə olunur. Bu da daxili bazara təsir edir. İndiki mərhələdə çörək qiymətlərinə təsir gözlənilmir. Lakin un məmulatlarının qiymətinə təsir edə bilər. Çörək strateji məhsul olduğundan qiymət dəyişiminə dərhal reaksiya verilmir”. 

Ekspert deyir ki, bahalaşmaya baxmayaraq indiki un qiymətləri ötən ilin iyul-avqust qiymətlərinə uyğun qiymətlərdir: “Ötən ilin avqustundan sonra qiymətlər ucuzlaşmaqda davam etdi və cari ilin fevral-mart aylarında kəskin ucuzlaşdı. Hazırda isə Avropa və Rusiyada məhsuldarlıqla bağlı məsələlər bazarda qiymətləri dəyişir”. 

X. Kərimli Azərbaycanın un idxalından olduqca asılı olduğunu vurğulayıb: “Ölkəmizə ərzaqlıq buğda ununun 75%-i idxal olunur. Azərbaycanda yığılan buğda bazarın 60% tələbini ödəsə də, ərzaqlıq buğda 25% tələbi ödəyir. Yerli buğdanın keyfiyyəti kifayət qədər yaxşı deyil. Bu baxımdan dünya bazarındakı proseslər daxili bazara təsir göstərir və göstərəcək”. 

“Hazırda çörək qiymətlərinin artımı gözlənilmir. Lakin bahalaşma davam edərsə təsirlər müşahidə oluna bilər”, - deyə ekspert əlavə edib.

Könül
Ölkə.Az