“Nissan”ın Çin şirkətləri ilə rəqabətində çətinlik: zavodunu bağlayır

Yaponiyanın nəhəng avtomobil istehsalçısı "Nissan" Çindəki zavodlarından birini bağlayır.

"Ölkə.Az" xarici mətbuata istinadən xəbər verir ki, şirkət Çinin Jiangsu əyalətinin Changcou şəhərindəki fabrikini bağlayacaq.

Çinin “Dongfeng Motor” şirkəti ilə əməkdaşlıq şəraitində fəaliyyət göstərən zavodda “Qashqai” kompakt idman modelinin istehsal olunduğu müəssisə dünəndən etibarən fəaliyyətini başa çatdırıb.

Bildirilib ki, illik 130 min ədəd istehsal gücünə malik olan fabrik Yaponiya şirkətinin Çindəki ümumi istehsal həcminin təxminən 10%-ni təşkil edir.

Bağlanma qərarının Çində satışların aşağı düşməsindən sonra yerli istehsal gücünü azaltmaq məqsədilə qəbul edildiyi bildirilir. Belə ki, yerli bazarda qiymət rəqabətinin artması nəticəsində Yaponiya şirkətinin satış həcmi tədricən azalıb və istehsal profisiti yaranıb.

Son məlumatlara görə, "Nissan"ın may ayında Çindəki yeni avtomobil satışları əvvəlki ilin eyni ayına nisbətən 2,8% azalıb, Çin avtomobil istehsalçılarının yerli bazarda, xüsusən də elektriklə işləyən avtomobillərdə üstünlükləri artıb. 

Ümumilikdə, avtomobil istehsalçılarının Asiya bazarında Çin şirkətləri ilə rəqabətdə çətinlik çəkdiyi bildirilir.

Könül
Ölkə.Az