Məşhur restoran qala divarına bitişik obyekt tikir? - FOTO

İçərişəhərdə qala divarı boyunca yeni obyektin tikildiyi bildirilir.

“Ölkə.Az”ın məlumatına görə, tikinti işləri ilə bağlı görüntülər sosial şəbəkələrdə paylaşılıb.

Təyinatının nə olduğu dəqiq açıqlanmasa da, obyektin restoran kimi fəaliyyət göstərəcəyi iddia edilir.

İrəli sürülən iddialardan biri də obyektin “Dolce Vita” restoranına məxsus olması ilə bağlıdır. Belə ki, restoranın sosial media hesabında yenidənqurma işləri ilə bağlı müvəqqəti olaraq bağlandığı qeyd olunub. Paylaşımın şərh bölümündə isə qala divarında obyekt tikintisi ilə bağlı restoran tənqid olunub.

Qeyd edək ki, rəsmi olaraq “Dolce Vita” MMC adındakı şirkətin qanuni təmsilçisi Laura Urusovadır.

“Ölkə.Az” tikili ilə bağlı Bakı Şəhər İcra Hakimiyyətinə müraciət etsə də, qurum rəsmisi bu barədə məlumatsız olduğunu bildirdi və bizi İçərişəhər Qoruq İdarəsinə yönləndirdi.

“Ölkə.Az” məsələ ilə bağlı İçərişəhər Qoruq İdarəsinə sorğu göndərib.

Könül
Ölkə.Az