ASAN xidmət qiymətli kağızlar bazarını da tənzimləyəcək

Bu gün Qiymətli Kağızlar üzrə Dövlət Komitəsində (QKDK) lisenziyalaşdırma prosesinin optimallaşdırılması və sahibkarlıq sahəsində aparılan yoxlamaların dayandırılması ilə bağlı Azərbaycan Prezidenti İlham Əliyevin tapşırıqlarının icrasına həsr olunmuş Kollegiya iclası keçirilib.

Bu barədə komitədən Ölkə.Az-a bildirilib.

Komitənin məlumatına görə, komitə sədri Rüfət Aslanlı bildirib ki, artıq iki ildir ki, qiymətli kağızlar bazarının peşəkar iştirakçılarında yerində yoxlamaların könüllü olaraq dayandırılıb.

Komitə sədri son illərdə kapital bazar institutlarının qanunauyğun fəaliyyətinin nəzarətdə saxlanması üçün effektiv hesabatlıq sistemi vasitəsilə bazarın davamlı inkişafının təmin edildiyini də qeyd edib.

Bundan başqa, lisenziyalaşdırma prosesinin sadələşdirilməsi və avtomatlaşdırılması məsələsinə toxunan sədr proseslərin qısa müddət ərzində və ən əsası, qiymətli kağızlar bazarı institutlarının fəaliyyətinə təsir etmədən tamamlanması üçün İqtisadiyyat və Sənaye Nazirliyi və ASAN xidmət ilə birgə işlərin aparılmasına dair müvafiq göstərişlərini verdi.