DGK beynəlxalq yarışmada qalib olan gəncdən mükafata görə pul tutdu - Narazılıq
Daha bir beynəlxalq yarışma qalibimiz öz mükafatını gömrükdə ödəniş etməklə əldə edib.
Ölkə.Az xəbər verir ki, bu barədə Azərbaycan internet Forumunun prezidenti Osman Gündüz məlumat verib. O bildirib ki, AzTU tələbəsi “Apple” şirkətinin hər il keçirdiyi “Swift Student Challenge” kodlaşdırma yarışmasının builki qaliblərindən biri olub:
“Bu yarışma çox spesifikdir, yarışma yalnız “Apple” şirkəti məhsulları üçün nəzərdə tutulan "Swift" proqramlaşdırma dili üzrə keçirilir.
Bildiyim qədərilə Azərbaycanda bu tip bacarıqlara sahib olanların sayı barmaqla sayıla bilər.
Qalib tələbəmiz şirkətdən rəsmi sertifikat və mükafat qazanıb. “Apple” bununla bağlı qalibə bildirişlər göndərib və mükafatını da poçtla göndərib.
“Apple” kimi nüfuzlu bir şirkət göndəriş sənədində də göndərilən malın mükafat olduğunu qeyd edib.
Hər şey də bundan sonra başlanıb.
Qalib tələbəmiz “Smart Customs”da simvolik bir gömrük dəyərini qeyd edərək bəyan edib və böyük bir həvəslə mükafatı götürmək üçün hava limanındakı gömrük qurumuna gedib.
Uzun-uzadı gözləmələrdən və araşdırmadan sonra mükafatın gömrük rüsumuna cəlb ediləcəyi bildirilib və gömrükçülər 177 manat gömrük rüsumu və 18 manat saxlama xərci alıb mükafatı qalibə veriblər".
O.Gündüz DGK-nın hələ də hədiyyə və mükafat məsələsinin gömrük tənzimlənməsini qaydaya sala bilmədiyini söyləyib:
"Əlbəttə, zaman-zaman hədiyyə ilə bağlı da belə problemlər olur.
Amma DGK uzun illərdir ki, beynəlxalq yarışlarda qazanılan mükafatları da hədiyyə kateqoriyasına daxil edib dərhal gömrük rüsumu tələb edir.
Əslində isə hədiyyə və mükafatlar bir-birindən fərqlidir. Onda belə çıxır ki Nobel Mükafatı ( 1 milyon auro) alan bir alimimiz 300 min də rüsum ödəyib bu mükafatı ölkəyə gətirə bilərmiş.
Bəlkə elə buna görə bizim alimlərimiz bu mükafatı istəmirlərmiş.
Xatırlayıram ki, çox sayda beynəlxalq yarışlarda mükafat qazanan vətəndaşlarımız da zaman-zaman belə problemlə üzləşiblər.
Bu, doğru bir hal deyil və uzun müddətdir ki, DGK bu problemi həll etməyə təşəbbüs göstərmir, hökumətə təkliflər vermir.
DGK tez-tez elan edir ki, peşəkar, xaricdə oxuyub gələn kadrları var, gömrükdə süni intellekt və innovasiyalar tətbiq edirlər.
Düşünürəm ki, əgər deyilənlər reallığı əks etdirirsə, DGK-da əyləşənlər mükafatı hədiyyədən, hədiyyəni də digər mallardan fərqləndirən ağlabatan bir mexanizm qura bilərlər. Ümid edirəm, nəzərə alacaqlar”.
Billurə
