Mədəni sərvətlərimizin ölkədən çıxarılması qadağan edildi

Nazirlər Kabineti qərar qəbul edib.

Nazirlər Kabineti, “Mədəni sərvətlərin idxalı, ixracı və Azərbaycan Respublikasının ərazisindən tranzitlə keçirilməsi Qaydaları”nı avqust ayının 29-da qəbul etdiyi 294 nömrəli qərarla təsdiqləyib.

Ölkə.Az abc.az-a istinadən xəbər verir ki, qaydaların tələbləri fiziki və hüquqi şəxslərə, o cümlədən dövlət idarələri və təşkilatlarına, onların məsul şəxslərinə aiddir.

Qaydalar bütün təsviri sənət, heykəltəraşlıq nümunələrinə; audiovizual sənətin, o cümlədən dizayn və memarlıq nümunələrinə; çap və əlyazma materiallarına; tətbiqi sənət nümunələrinə: xalçalar və zərgərlik məmulatları daxil olmaqla; səhnə geyimi və butaforiya; 30 ildən çox tarixi olan muzey eksponatları, arxeoloji artefaktlara və s. tətbiq edilir.

Milli mədəni irs siyahısına daxil edilən əşyaların ölkədən çıxarılması tamamən qadağandır. Bir əsr tarixi olan kitabların, əlyazmaların, sikkələrin, markaların, musiqi alətlərinin, mebel məmulatlarının da Azərbaycandan çıxarılmasına icazə verilmir.

Digər mədəni sərvətlər yalnız Mədəniyyət və Turizm Nazirliyinin icazəsi ilə ölkədən çıxarıla bilər. Bu zaman xüsusi ekspertiza təyin edilə bilər.

Ölkə.Az