Avropa-Qafqaz-Asiya dəhlizi ilə daşınan sərnişinlərin sayı artdı

Cari ilin yanvar-sentyabr aylarında Avropa-Qafqaz-Asiya nəqliyyat dəhlizinin Azərbaycan hissəsində yük daşınması 39,3 milyon ton, yük dövriyyəsi isə 8313,1 milyon ton-km olub.

Bu barədə Dövlət Statistika Komitəsindən (DSK) bildirilib.

“Yüklərin 22,86 milyon tonu və ya 58,2 %-i avtomobil nəqliyyatı, 11,70 milyon tonu və ya 29,8%-i dəmir yolu nəqliyyatı, 4,72 milyon tonu və ya 12%-i dəniz nəqliyyatı ilə daşınıb”, - deyə komitədən qeyd edilib.

Statistika Komitəsindən bildiriblər ki, ötən ilin müvafiq dövrü ilə müqayisədə dəhliz vasitəsilə daşınmış yüklərin həcmi 9,3% azalıb:

“Bunun əsas səbəbi dəmir yolu və dəniz nəqliyyatı ilə yük daşınmasındakı azalmalar (müvafiq olaraq 21,3 və 30,8%) olub. Qeyd olunan dövrdə avtomobil nəqliyyatı ilə daşınmış yüklərin həcmi 5,8% artıb. Dəhliz vasitəsilə daşınmış yüklərin 18,3%-ni və ya 7,2 milyon tonunu tranzit yüklər təşkil edib”.

Bundan başqa, komitə dəhliz vasitəsilə daşınan sərnişinlərin sayının artdığını qeyd edib:

“Cari ilin yanvar-sentyabr aylarında dəhliz vasitəsilə 247,5 milyon sərnişin daşınıb, sərnişin dövriyyəsi 5003,7 milyon sərnişin-km olub. Ötən ilin müvafiq dövrü ilə müqayisədə sərnişin daşınması və sərnişin dövriyyəsi 7,8% artıb.Sərnişin daşınmasındakı artım avtomobil nəqliyyatı ilə daşımalar hesabına baş verib”.

Ölkə.Az