Quş qripi ilə əlaqədar yoxlamaların nəticələri açıqlandı
Quş qripi ilə əlaqədar noyabrın 2-dən start götürən yoxlamalar bu gün başa çatıb.
Bu barədə Kənd Təsərrüfatı Nazirliyi yanında Dövlət Baytarlıq Nəzarəti Xidmətinin mətbuat xidmətinin rəhbəri Yolçu (Xanvəli) Həsənov bildirib.
Onun sözlərinə görə, müayinələrin nəticələri əsasında ölkədə quş qripi xəstəliyinin törədicisi aşkar edilməyib:
“Quş qripi xəstəliyinə görə aparılan növbəti monitorinq zamanı seçmə üsulla ovlanaraq götürülən 20 baş çöl quşunun patoloji materialı və ölkəmizin ayrı-ayrı quşçuluq və həyətyanı təsərrüfatlarından gətirilən 1835 baş ev quşunun qan nümunələri baytarlıq laboratoriyasında müvafiq müayinələrdən keçirilib. Müayinələr bu gün başa çatıb və nümunələrin heç birində “quş qripi” xəstəliyinin törədicisi müəyyən edilməyib”, - deyə o, bildirib.
Xidmətin rəsmisi həmçinin qeyd edib ki, növbəti monitorinq dekabrın 7-də baş tutacaq.
Ölkə.Az
