Ev sahibi olmaq istəyənlərə şad xəbər – “Pensiya belə sənəddə gəlir kimi göstərilə bilər”
Əhalinin dəstək üçün İpoteka və Kredit Zəmanət Fondu satmaq öhdəliyi ilə kirayə mexanizmi əsasında mənzillərin satışını davam etdirir. Statistikaya görə, bu günə qədər Azərbaycanda kirayə mənzil mexanizmi vasitəsilə 5 525 (bu il – 1139) vətəndaş, yaxud ailə özünün mənzil şəraitini yaxşılaşdırıb.
İndiyədək satmaq öhdəliyi ilə kirayə mexanizmi çərçivəsində Fond vətəndaşlara 14 ünvanda mənzillər təqdim edib. Onlardan 6-sı Bakı və 3-ü Xırdalan şəhərlərində, 3-ü Abşeron rayonunun Masazır, Saray və Məmmədli qəsəbələrində, daha 2-si isə Sumqayıt şəhərində yerləşir.
Bu tip mənzilləri əldə etmək üçün nələr lazımdır?
Ölkə.az xəbər verir ki, mövzu ilə bağlı Yenisabah.az-a danışan əmlak məsələləri üzrə ekspert Elnur Fərzəliyev bildirib ki, həmin mənzillər sadələşdirilmiş ipoteka şərtləri ilə verilir:
“Layihəyə İpoteka Fondu start verib və adı “Satmaq öhdəliyi ilə kirayə mənzillər”dir. Bu binalardakı mənzillər satışa çıxarılır, yəni sistemə vurulur. Tam təmirli mənzillər sadələşmiş ipoteka krediti formasında vətəndaşlara verilir.
Adı ona görə “kirayə mənzillər” layihəsidir ki, onların aylıq ödənişi vətəndaşın hansısa ünvanda aylıq ödədiyi kirayə qiyməti ilə eynidir. İlkin ödənişi olduqca azdır. Məsələn, aylığı 500 manatdırsa, ilkin ödəniş məbləği onun 12 misli, yəni 6 min manatdır”.
Ekspert qeyd edib ki, mənzillərin verilməsi üçün tələb olunan sənədlər də olduqca sadədir:
“Satmaq öhdəliyi ona görə qeyd olunub ki, ipoteka krediti ilə mənzil alan şəxs, o krediti bağlamadığı müddətcə həmin mənzili sata bilmir. Amma burada vətəndaş mənzili aldığı müddətdən bəlli zaman sonra, ödəmə qabiliyyəti olmadıqda, başqa bir şəxsə sata bilər. İpoteka Fondu vətəndaşlara bu imkanı verir. Digər tərəfdən, bu cür evləri əldə etmək üçün tələb olunan sənədlər toplusu elə də qəliz deyil. Şəxsin özünün gəliri, əgər öz gəliri azdırsa, ailə üzvlərinin, hətta ata və anasının təqaüdünü belə gəlir kimi göstərə bilər. Bu, xüsusən, gənc ailələr üçün olduqca yaxşı fürsətdir”.
