Komitə yoxlamalarda yeni üsul tətbiq edir

Biz Azərbaycan prezidenti İlham Əliyevin sərəncamından sonra planlı yoxlamaları dayandırmışıq. Sadəcə bilirsiz indi müəyyən mexanizmlər var, ancaq mexanizmlərin üzərində işləmək lazımdır. Biz hazırda onun üstündə işləyirik və müvafiq olan sənədi hökumətə təqdim edəcəyik.

Oxu.Az xəbər verir ki, bu sözləri Caspian European Club-ın təşkil etdiyi biznes-forum çərçivəsində jurnalistlərə Standartlaşdırma, Metrologiya və Patent üzrə Dövlət Komitəsinin sədri Ramiz Həsənov bildirib. 

Onun sözlərinə görə, ölkədə yoxlamalar sivil dövlətlərin nəzarət sistemlərinə uyğunlaşdırılmalıdır:

“Biz hazırda yoxlamaların istiqamətini bir qədər dəyişmişik. Belə ki, bizim nəzarət xidmətinə müvafiq tapşrııq verilib, bazarda monitorinq aparırıq. Yəni, heç müəssisəyə getmədən müəsisəsinin istehsal etdiyi məhsulu alırıq, laboratoriyada onun analizlərini edirik, orda bir problem olanda müəssisəyə müvafiq tələbnamələr göndəririk”, - deyə komitə sədri deyib. 

Komitə sədri planlı yoxlamaların əleyhinə olduğunu da qeyd edib:

“Şəxsən mən planlı yoxlamaların əleyhinəyəm. Müəssisəyə getməyə, orda araşdırma aparmağa ehtiyac yoxdur. Sadəcə dediyim kimi bazar ilə müəyyən etmək olar ki, hansı məhsul hansı keyfiyyətdədir.

Əgər məhsul idxal məhsuludursa, bu barədə Dövlət Gömrük Komitəsinə keyfiyyətsiz məhsulun idxalını dayandırması ilə bağlı məktub yazırıq. Daxili istehsalçının isə özünə məktub göndərilir, ona bir ay ərzində müəyyən edilən nöqsanların aradan qaldırılması tapşırılır. Əgər bir ay ərzində bunu etmirsə, bu halda cərimə sanksiyaları tətbiq edilir”.

Bundan başqa, R.Həsənov komitənin bəzi şöbələrinin ixtisar edilməyəcəyini deyib.