Digər ölkələrdə avtobus zolaqları necə işləyir? - Fotofakt

“Dünyanın bir çox ölkələrində avtobus zolaqlarında təkcə avtobuslar hərəkət etmir. Məsələn, Londonda lisenziyalı London taksiləri, yan qoşqusu olmayan motosikletlər, mopedlər, skuterlər, motorsuz üç təkərlər, 450cc-dən aşağı motorlu üç təkərlər və velosipedlər avtobus zolaqlarından istifadə edə bilər. Bu, proses şəhərdən-şəhərə dəyişir”. 

Ölkə.Az xəbər verir ki, bunu yol-nəqliyyat eksperti Elməddin Muradlı qeyd edib. Onun sözlərinə görə, bəzi şəhərlərdə motoların zolağa girməsinə icazə verilməsə də, ümumən bir çoxunda icazə var:

“İstənilən halda taksilərin avtobus zolağına girməsinə icazə vermək vacibdir.

Yol infrastukturu zəif olan bəzi ölkələrdə isə avtobus zolaqları bütöv xətlə yox, qırıq-qırıq xətlə ayrılır. Bu o deməkdir ki, istənilən halda digər nəqliyyat vasitələri avtobus zolağına daxil olaraq sərnişin və ya yüklərin mindirib-düşülməsini həyata keçirə bilər. Eyni zamanda, məcburi dayanma zamanı da sürücü maşını yolun əsas hissəsindən kənarlaşdıra bilir. 
Bəzi ölkələrdə isə avtobus zolağı sol zolaqda çəkilir və ya orta zolaqda xüsusi mühafizə olunan formada qurulur ki, burada artıq digər nəqliyyat vasitələrinin girşi faktiki olaraq mümkün olmur. Bu qaydalar o ölkələrdə edilir ki, onların yol infrastrukturu inkişaf edib, zəbt edilməyib, yolu kəsib bina tikməyiblər”.

E.Muradlı bildirib ki, digər nəqliyyat vasitələrinin avtobus zolaqlarından yalnız zərurət yarandıqda istifadə etməsi isə sürücü mədəniyyəti inkişaf etmiş ölkələrdə daha geniş yayılıb:

“Orada insanlar başa düşür ki, zərurət olmasa, zolağa daxil olmaq olmaz. Bizdə isə icazə verildiyi təqdirdə avtobus zolaqlarında hoqqabazlıq edənlərin sayının artacağına hər kəs əmindir. Bunun qarşısını da almaq mümkündür. Yollardakı və avtobusların ön və arxa hissəsində quraşdırılan kameralar belə sürücüləri aşkar edə biləcək. Kiçik araşdırma zamanı müəyyən etmək olar ki, adam zolağa kefindən girib, yoxsa zərurət yaranıb.
Son nəticədə avtobus zolaqlarını daha səmərəli etməklə taksilər, velosipedlər, skuter və digər nəqliyyat vasitələri üçün əlçatan etmək faydalı olar. Məsələn, avtobus zolağı olan küçələrdə əlavə velozolaq yaratmağa lüzum yoxdur. Bir nişan quraşdırıb bu tip nəqliyyat vasitələrini bir zolağa yönləndirmək mümkündür”.

Billurə Yunus