Nazir müavini: İKT sektorunda Koreya təcrübəsinin öyrənilməsi faydalı ola bilər

İqtisadiyyatın İKT sektorunun davamlı inkişafı və rəqabət qabiliyyətinin artırılması, ixracyönümlü məhsul və xidmət istehsalının genişləndirilməsi məqsədilə ölkədə yüksək texnologiyalar parklarının fəaliyyətinin təşkili üzrə məqsədyönlü işlər aparılır, elektron hökumətin formalaşdırılması uğurla davam edir.

Ölkə.Az Rabitə və Yüksək Texnologiyalar Nazirliyinə istinadən xəbər verir ki, bu sözləri nazirinin müavini Elmir Vəlizadə Azərbaycanla Tərəfdaşlıq Strategiyasının hazırlanması ilə əlaqədar ölkəmizdə səfərdə olan Koreyanın Strategiya və Maliyyə Nazirliyinin nümayəndə heyəti ilə görüşdə bildirib. 

O, bu sahələrdə əməkdaşlıq və Koreyanın qabaqcıl təcrübəsinin öyrənilməsinin tərəfdaşlıq üçün faydalı ola biləcəyini bildirib. 

Görüşdə, Koreyanın Strategiya və Maliyyə Nazirliyinin (SMN) nümayəndə heyətinin rəhbəri, SMN-in Beynəlxalq İnkişaf Siyasəti İdarəsinin direktoru Han Jung da ölkəsinin Azərbaycanla əməkdaşlığa xüsusi diqqət verdiyini və 2016-2020-ci illər üçün “Ölkə Tərəfdaşlıq Strategiyası”nda bunun əks olunduğunu bildirib. 
 
Sənəd layihəsində İKT sahəsinin prioritet istiqamətlərdən biri kimi daxil edildiyi qeyd edilib.

Qeyd edək ki, rabitə və yüksək texnologiyalar sahəsinin prioritet istiqamət kimi ölkənin gələcək iqtisadi inkişaf hədəflərində, o cümlədən “Azərbaycan-2020: Gələcəyə Baxış” İnkişaf Konsepsiyasında əsas yer alır. 

Ölkə.Az