ABŞ-ın dollar qərarı azərbaycanlıları hərəkətə keçirdi

ABŞ Federal Ehtiyat Sisteminin (FES) dolların baza faiz dərəcəsini 0,25%-dən 0,5%-ə qədər yüksəltməsi Azərbaycanda da insanlar arasında dolların bahalaşacağı fikrini formalaşdırıb. Bu da öz növbəsində əhalinin dollar alqı-satqısı mərkəzlərinə üz tutmasına səbəb olub.

Ölkə.Az-ın ans press-ə istinadən məlumatına görə, mübadilə ilə məşğul olan şəxslər də bu gün səhərdən başlayaraq dollar satışında artım olduğunu etiraf edirlər.

Valyuta dəyişmə fəaliyyəti ilə məşğul olan Rəşad İsmayılov deyir ki, bu gün səhərdən etibarən ona məxsus mübadilə məntəqəsində canlanma hiss olunmağa başlayıb:

“Onu deyə bilərəm ki, əvvəlki günlərlə müqayisədə bu gün təxminən 10% daha çox dollar satmışam. Alıcılarla söhbət etdiyimdə özüm də nə üçün bu gün dollara daha çox maraq göstərdiklərini soruşuram. Vətəndaşlar isə birmənalı olaraq ABŞ valyutasının bahalaşacağından ehtiyat etdikləri üçün pullarını həmin valyuta ilə saxlamaq istədikərini bildirirlər. Düşünürəm ki, gələn günlərdə də bu artım davam edəcək. Vətəndaşların vəsaitlərini dəyişəcək kifayət qədər dollar ehtiyatımız da var”.

Şəhər sakini İlham Mustafayev də əlində olan manatı dollara çevirən vətəndaşlardan biridir. Deyir ki, ölkəmizdə gec-tez dolların bahalaşması olacaq. Ona görə də pulunu dollara çevirir:

“Düşünürəm ki, bundan sonra dollar daha aşağı düşməz. Əlimdə də bir az pul vardı. Onsuz da fevral devalivasiyasından əvvəl pulumu dollara çevirmədiyimə peşmanam. İndi isə riskə gedə bilmərəm. Ona görə də öz pulumu dollara çevirirəm”.

Qeyd edək ki, Mərkəzi Bank bu gün üçün dolların rəsmi məzənnəsini 1.0499 AZN müəyyən etsə də, mübadilə məntəqələrində dollar 1.056 AZN-ə satılır.

Ölkə.Az