\"Mərkəzi Bankdan kimsə bilə-bilə qara bazarda qiymətləri qaldırır\"

Şənbə və bazar günləri "qara bazar"da 1 dolların qiyməti 2 manat, 2 manat 20 qəpik arasında dəyişdi.

İstirahət günləri əhali 1 dolların 3 manat olacağı şayələrinə inanaraq əlindəki manatdan canını qurtarmaq üçün "qara bazar"a üz tutdu. İş günü günləri olmadığından müvafiq orqanlardan heç kəs vəziyyətə müdaxilə etmədi və bir qrup möhtəkir külli miqdarda pullar qazandı.

Ölkədə baş verən son sosial-iqtisadi prosesləri ekspert Əkrəm Həsənov Ölkə.Az-a şərh edib:

""Qara bazar"ın qarşısını almaq olar. "Qara bazar"ın olması qanun pozuntusudur. Qanunla valyutadəyişmə əməliyyatını yalnız banklar və bankların valyutadəyişmə şöbələri həyata keçirə bilər. Ona görə də, "qara bazar"da valyuta alveri ilə məşğul olanlar qanunsuz bank fəaliyyəti ilə məşğul olmuş kimidirlər. Buna görə də həmin şəxslər qanunla nəzərdə tutulmuş məsuliyyəti daşımalıdırlar. Təbii ki, belə gərgin, böhranlı vəziyyətdə yalnız inzibati yollarla bunun qarşısını almaq olmur, ancaq bunu etmək lazımdır. Hüquq-mühafizə orqanları belə halların qarşısını almalıdır. Burada başqa metodlardan da istifadə etmək lazımdır. Mərkəzi Bank əslində lazımı addımları atmalı idi. Mərkəzi Bankın indiki idarə heyətinin üzvləri artıq 20 ildir ki, eyni vəzifədədirlər və 90-cı illərin "qara bazarı"nı görüblər. Onlar çox gözəl başa düşməli idilər ki, devalvasiyadan sonra ajiotaj olacaq. Bəziləri bundan istifadə etməyə çalışacaq və əhalini çaşdıracaqlar.

Bunun olmaması üçün sadəcə şənbə və bazar günləri Mərkəzi Bank işləməli idi. Bir neçə həftə ərzində Mərkəzi Bank işləməli idi. Bank rəhbərləri ilə Mərkəzi Bank arasında görüş olub. Mərkəzi Bank həmin görüşdə banklarla danışğa gələ bilərdi ki, şənbə bazar günü bankların bəzi valyuta dəyişmə məntəqələri işləsin. Belə olsa idi təbii ki, bu cür ajiotaj yaranmazdı. Ən yaxşı halda işləmək istəmirlər, gördükləri işin öhdəsindən gələ bilmirlər. Ən pis halda isə belə bir fikirlər yaranır ki, bəlkə Mərkəzi Bankdan kimsə bilə-bilə "qara bazar"da qiymətləri qaldırır. "Qara bazar"da alver edənlərin arxasında dayanan bəlkə də Mərkəzi Bankıdır. Çox təəssüf ki, belə bir fikirlər formalaşır. Çünki bu qədər qeyri-peşakarlıq gözləmirdim"".

Səxavət Məmməd
Ölkə.Az