Neft ölkələri tarixi iflasla üz-üzə

Neft İxrac edən Ölkələr Birliyinin (OPEC) hasilatı azaltmaması, ABŞ-ın neft ixracını artırması, İran üzərindəki sanksiyaların qalxması ilə istehsalını artırması ilə neft qiymətlərinin aşağı düşməkdə davam edəcəyi gözlənilir.

Dolların güclü gedişi ilə qlobal iqtisadiyyatdakı qeyri- stabilliyin davam edəcəyi ehtimalı da neft qiymətlərində azalma istiqamətində yeni rekordların çox uzaq olmadığını gündəmdə saxlayır.

2014-ün İyun ayında barrelinin qiyməti 114 dollardan satılan Brent nefti 2015-ci ili 36 dollardan başa vurdu. Ancaq görünən odur ki, bu səviyyə neftin gördüyü ən aşağı səviyyə olmayacaq. Səudiyyə Ərəbistanının ABŞ-da şist qazı üsulu ilə neft hasil edən şirkətlərə açdığı “müharibə” nəticəsində son 11 ilin ən aşağı səviyyəsində olan neftin 20 dollar səviyyələrinə qədər enəcəyi bildirilir.

Səudiyyə Ərəbistanı bazarda təklif çoxluğu olmasına baxmayaraq istehsalını salmayaraq neft qiymətlərini aşağı saxlamaqda davam edir. Bu da neftin 2016-cı ildə də aşağı düşməkdə davam edəcəyinə işarə edir. Neft qiymətlərinin aşağı olması isə neft hasil edən ölkələrin gəlirlərinin kəskin azalması ilə nəticələnir. Aparılan hesablamalara görə, Yaxın Şərqdəki neft istehsalçılarının büdcələri bu il 350 milyard dollar kəsir verəcək. 2016-da isə neft ilə zəngin olan ölkələr iflas ilə qarşı-qarşıya qalacaq.(Marja)

Ölkə.Az