Vüqar Bayramov: \"Lombardların fəaliyyətinə müdaxiləyə ciddi şəkildə ehtiyac var\"

Devalvasiyadan sonra əsas gündəm mövzusu bank kreditləridir.

Bu məsələdə gözdən qaçan, demək olar ki, banklar qədər geniş fəaliyyət göstərən lombardlardır.

Lombardlarla bağlı məsələ isə daha acınacaqlıdır. Banklar hardasa güzəşt edə, kreditin vaxtını uzada bilər. Lombardlarda vəziyyət isə tam tərsinədir.

Bu məsələ ilə bağlı iqtisadçı ekspert Vüqar Bayramov Ölkə.Az-a danışıb:

"Manatın devalvasiyasından sonra ən çox müzakirə edilən məsələ bankların kreditlərə güzəşt etməsi idi. Ancaq bu müzakirə zamanı təəssüf ki, lombardlar bu məsələdən kənar qalıb. Lombardlar böyük məbləğdə və yüksək faizlə, dollarla vətəndaşlara borc veriblər. Bu gün həmin borcu da geri alırlar. Banklar istehlak kreditlərini zaminsiz və girovsuz veriblərsə, lombardlarda girov var, qızıl zinət əşyaları, daş-qaşlar. Ona görə də, lombardlarla bağlı məsələ daha problematik və daha çətindir. Bu məsələnin aradan qaldırılmasına ehtiyac var. Bizim monitorinqlər onu göstərir ki, lombardlar vətəndaşa hər-hansı güzəşt etmirlər. Ödənişin həyata keçirilməsini, hətta dollarla həyata keçirilməsini tələb edirlər. Son devalvasiyadan sonra lombardların fəaliyyətinə nəzarətin genişləndirilməsi və lombarddan borc alan vətəndaşların hüquqlarının qorunmasına dair addımların atılmasına ehtiyac var.

Bu gün banka borcu olan vətəndaşlar banklara, lombarda borcu olan vətəndaşlar isə lombardlara borcunu qaytara bilmir. Nəticədə isə lombardlar vətəndaşların qızıl-zinət əşyaları və daş-qaşlarını borc qarşılığında götürəcəklər. Problem kifayət qədər ciddidir. Lombardların fəaliyyətinə müdaxiləyə ciddi şəkildə ehtiyac var".

Səxavət Məmməd
Ölkə.Az