Bahalaşma təhlükəli siqaret istehsalını artıracaq

Ölkədə onsuz da təhlükəli siqaretlər çoxdur. Qiymətlərin qalxması bu kimi təhlükəli malların satışını çoxaldacaq.

Ölkə.Az xəbət verir ki, bunu Azad İstehlakçılar Birliyinin sədri Eyyub Hüseynov Modern.az-a bildirib.

O deyib ki, siqaretlərin qiymət artımından sonra bəzi insanların bu zərərli vərdişdən imtina edəcəyini düşünür:

“Ümumiyyətlə, bu gün siqaretlərin qiymətinin artmasına dünyada gedən siqaret əleyhinə kampaniyanın tərkib hissəsi kimi baxıram. Necə gündür ki, bununla bağlı Azad İstehlakçılar Birliyinə telefon zəngləri daxil olur. Bahalaşma siqareti kütləvi tərgitməklə nəticələnəcək. Bu çox yaxşı bir cəhətdir”.

Eyyub Hüseynov tütün məhsullarının qiymətlərinin artması ilə büdcəsinin doldurmaq üsulunun düzgün yanaşma olmadığını bildirib:

“Siqaret məişət narkomaniyası sayılır. Əgər kimlərsə düşünürsə ki, bu yolla büdcəyə daxil olan gəlirləri artıracaq, bu, səhv yanaşmadır”.

E.Hüseynov deyir ki, istifadəçilərin siqaretdən birdən-birə imtina etməsi mümkünsüzdür və bu tədricən baş verəcək.

Siqaretin qiymətinin artmasının mənfi fəsadlar doğrucağından danışan AİB sədrinin sözlərinə görə, bu, özünü keyfiyyətsiz, radiasiyalı mal istehsalında göstərəcək:

“İndiki durumda onsuz da devalvasiya nəticəsində daxili istehsal olan və olmayan gündəlik tələbat, qida məhsullarının qiymətləri qalxıb. Bu səbəbdən də yeməyini, ac qalmamağını siqaretdən üstün tutan, normal düşüncəli insanlar bu zərərli vərdişdən vaz keçəcəklər.

Əsas məsələ odur ki, qiymətlərin qalxması ilə onsuz da keyfiyyətsiz olan tütün məhsullarının ucuz olanlarına tələbat artacaq. Nəticədə isə nisbətən ucuz və zərərli tütün məhsulları istehlakçılara təklif olunacaq. Ölkədə onsuz da təhlükəli siqaretlər çoxdur. Qiymətlərin qalxması bu kimi təhlükəli malların satışını çoxaldacaq. 5 il əvvəl Azərbaycanda radiasiyalı siqaretlər müəyyən etmişdik. Belə siqaretlər insanda sağalmaz, çox qorxulu xəstəliklərə gətirib çıxarır”.

Ölkə.Az