"Bu məbləğin yenidən 1000 dollar olması vətəndaşların tələbini ödəməyəcək"

Prezident İlham Əliyev “Gömrük sahəsində nəzarətin həyata keçirilməsi ilə əlaqədar bəzi yoxlamaların sadələşdirilməsi haqqında” Azərbaycan Respublikası Prezidentinin 2015-ci il 22 oktyabr tarixli 656 nömrəli fərmanında dəyişiklik edilməsi barədə fərman imzalayıb.

2015-ci il 22 oktyabr tarixli 656 nömrəli fərmanının 1-ci hissəsi ləğv edilib. Bu isə o deməkdir ki, vətəndaşlar artıq rüsum ödəmədən ölkəyə 10 min dollarlıq mal yox, 1000 dollarlıq mal keçirə biləcəklər.

Bu fərmanı iqtisadçı ekspert Vüqar Bayramov Ölkə.Az-a verdiyi açıqlamasında şərh edib:

"Fərmanın birinci maddəsinin nə üçün ləğv edilməsini izah etmək çətindir. Əslində 10 min dollar həcmində malın rüsumsuz ölkəyə gətirilməsinin tərəfdarıyıq. Vətəndaşların öz daxili istehlakı üçün lazım olan malları rüsum ödəmədən ölkəyə gətirməsi mümkün olmayacaq, çünki əvvəlki məbləğ qüvvəyə minir.

Əvvəlki məbləğin yenidən qüvvəyə minməsini izah etmək çox çətindir. Bilinmir ki, bu yeni gömrük qaydalarının tətbiq edilməsi ilə bağlıdır, yoxsa rüsumlara yenidən baxılacaq və yaxud başqa formada güzəştlər tətbiq ediləcək. Hələ dəqiq məlum deyil.

Vətəndaşlara şəxsi istifadələri üçün müəyyən məbləğdə malın gətirilməsinə imkan verilməlidir. Bu məbləğ 10 min dollar olmaya bilər, 5 min dollar ola bilər, ancaq min dollar çox azdır. 10 min dollar məbləğinin müzakirəsi mümkündür. Ancaq bu məbləğin yenidən 1000 dollar olması vətəndaşların tələbini ödəməyəcək".

Xatırladaq ki, fərmanın ləğv edilmiş 1-ci hissəsi belə idi:

"Fiziki şəxslər tərəfindən Azərbaycan Respublikasının gömrük ərazisinə gətirilən və istehsal, yaxud kommersiya məqsədləri üçün nəzərdə tutulmayan ümumi gömrük dəyəri 10 min ABŞ dolları ekvivalenti məbləğindən (müşayiət edilən hər bir yetkinlik yaşına çatmamış fiziki şəxsə görə əlavə 2000 ABŞ dolları ekvivalenti məbləğindən) artıq olmayan mallar (aksizli mallar, avtonəqliyyat vasitələri və səfər zamanı fiziki şəxsin zəruri ehtiyaclarının ödənilməsi üçün nəzərdə tutulan əşyalar istisna olmaqla) gömrük ödənişi ödənilmədən gömrük sərhədindən keçirilir".

Səxavət Məmməd
Ölkə.Az