BP Azərbaycanda əlavə neft mənbələri axtarır

Mart ayının 1-dən etibarən BP-Azərbaycan şirkəti potensial perspektiv strukturlarda üçölçülü seysmik tədqiqatlara başlamağı planlaşdırır.

Həmin strukturlar Abşeron yarımadasının və Xəzərin Azərbaycan sektorunun ətrafında dərin olmayan hissələrdə yerləşir.

Ölkə.Az xəbər verir ki, bu barədə şirkətin saytında yerləşdirilmiş Ətraf mühitə təsirin qiymətləndirilməsi barədə hesabatda yazılıb.

Hesabatın layihəsi AECOM şirkəti tərəfindən hazırlanıb və 2016-cı ilin fevral ayının sonuna kimi təklif və qeydlər üçün açıqdır.

Hesabatda qeyd olunur ki, müqavilə meydançasında həyata keçiriləcək geoloji kəşfiyyat işləri həm ikiölçülü, həm də üçölçülü seysmik tədqiqatları özündə ehtiva edir. “Üçölçülü tədqiqat işlərinin məqsədi sonradan kəşfiyyat işlərinin və sahələrin işlənməsinin planlaşdırılmasında istifadə olunacaq geofizik göstəricilərin toplanmasıdır. 3D-seysmoloji tədqiqat mart ayının 1-dən noyabr ayının 24-dək aparılacaq”, - hesabatda belə deyilir.

Abşeron yarımadasında potensial strukturlarda geoloji kəşfiyyat işlərinin aparılması ilə bağlı müqavilə SOCAR və BP arasında 2014-cü ilin dekabr ayında imzalanmış və 2015-ci ilin aprel ayında ratifikasiya olunmuşdur.

Ölkə.Az